絲絲講場：關家明長情攬渣打
渣打近年業績麻麻，絲絲咁啱碰到渣打前高層關家明（Nicholas），毒舌絲絲忍唔住口問佢：係咪好彩早跳船呢！Nicholas即答「千祈唔好咁講」，佢話渣打○八、○九年都冇沉，呢隻船冇乜機會會沉喇。佢仲講明自己依家仲係渣打股東，啲渣打股票佢會長揸坐住。
Nicholas依家雖身在貿發局做研究總監，但話晒佢以前係渣打東半球研究總監及亞洲區總經濟分析師，佢知道渣打高層換班，遲吓會約舊同事出嚟飲茶。佢話都知依家銀行業好難做，但總之叫渣打加油，希望佢愈做愈好。
照抽滙豐紀念鈔
對渣打咁長情，咁仲抽唔抽滙豐150周年紀念鈔？Nicholas話有興趣，不過估計都係散抽一、兩張咁，放落床下底喎。坐住渣打股，瞓住滙豐鈔！
余絲韻