Thomas出晒名係人民幣專家，當年喺滙豐專責做人仔生意，仲做過銀行公會人仔工作小組負責人。絲絲數數手指，Thomas係兩年幾前先由滙豐空降恒生中國做副行長，去幫一姐李慧敏睇住內地市場。估唔到，咁快就遞信走。
中行副行長已有人選
恒生就話，現時兼任埋商業銀行業務主管嘅Thomas，會做到今年六月先走。商業銀行主管個位，會由現時管理部主管區偉權（Kelvin）升任；咁副行長個位呢？絲絲就暫時唔講得住呀。
講埋講得嗰啲先。剛才講開中行副行長岳毅個位，尋日已經正式通過由中銀香港副總裁高迎欣接任，現只係等批。
余絲韻