絲絲講場:恒生人仔專家劈炮

羊年硬係比較多人事變動,好似銀行界呢排就大執位。中銀香港(02388)總裁和廣北榮休,個位由中行(03988)副行長岳毅接任,呢樣你可能已經知。嗱,絲絲細細聲八多單你知:恒生中國第二把交椅潘漢生(Thomas)亦已靜靜雞遞咗辭職信。

Thomas出晒名係人民幣專家,當年喺滙豐專責做人仔生意,仲做過銀行公會人仔工作小組負責人。絲絲數數手指,Thomas係兩年幾前先由滙豐空降恒生中國做副行長,去幫一姐李慧敏睇住內地市場。估唔到,咁快就遞信走。

中行副行長已有人選

恒生就話,現時兼任埋商業銀行業務主管嘅Thomas,會做到今年六月先走。商業銀行主管個位,會由現時管理部主管區偉權(Kelvin)升任;咁副行長個位呢?絲絲就暫時唔講得住呀。

講埋講得嗰啲先。剛才講開中行副行長岳毅個位,尋日已經正式通過由中銀香港副總裁高迎欣接任,現只係等批。

余絲韻