絲絲講場：中國女首富接班無期？

碧桂園楊國強未想退

計落，呢位碧桂園嘅靈魂都年屆六十，幾時退休？楊國強即刻反問「你想我退休？我好努力做嘢，講退休早咗啲囉！」睇嚟，Daddy未打算咁快交棒畀二女，即係集團副主席楊惠妍。想喺業績會上見到「楊千金」，可能要再等多幾年先得。

斌字輩高帽滿場飛

楊國強又一味猛讚台上其餘三位碧桂園管理層全部都係「文武雙全」！

絲絲一睇，聯席總裁朱榮「斌」、總裁莫「斌」與CFO吳建「斌」，三個名咁啱都有個「斌」字，果然「有文有武」！

莫斌即時向楊國強回禮，不斷感激楊國強嘅領導，話楊係公司嘅靈魂人物，充滿個人魅力，花唔少心血培訓人才……絲絲睇住啲「高帽」飛來飛去，惟有暗叫好武功。

絲絲記得，恒地（00012）主席李兆基（四叔）早前話，有同楊國強研究喺內地興建為長者而設嘅「安居屋」，尋日提起，楊國強話四叔係佢好尊敬嘅長輩，「好開心佢為香港做事，佢希望我參與……咁我都希望為香港做好事……」不過絲絲聽落，佢對嚟香港發展似乎無乜特別興趣。

余絲韻