Market Insight：聯通可先下第一注

昨日古勝晏晝飯聚，一班炒鬼老友完全唔當冧市一回事，心情不知幾好，唔知仲以為佢哋低吸咗堆暴升三四線股。實情係個個早在中國減息趁高清晒倉，等個市插夠皮至入市，反而望住個美金狂升，唔係研究緊去邊度旅行濕平，就講緊話準備換番些少澳元、英鎊，趁平幫仔女準備定下期學費咁話。

美國可能提早加息，同歐日息差進一步拓闊的考慮，美金近期升到爆，美匯指數隔晚抽上98.6，大有挑戰100關口之勢。睇番由舊年七月的80水平起步，半年多少少時間升值兩成三，都咪話唔得人驚。港元同美金掛鈎，意味香港人出去旅行，購買力半年大升兩成幾，與其對住個死死吓魚缸捱日子，索性出去使吓錢好過。

憂應付幣戰出招遲

但話說回頭，人仔同美金關係向來最直接，在目前貨幣戰爭下，北大人相當了解人仔一日唔貶值，一日好難刺激到出口的事實，人仔係就係兌美元由一四年高位貶值咗近4%，但在美金強到癲底下，人仔兌歐元、日圓，以至其他東盟貨幣統統都在升值當中。

即使去年十一月開始人行貨幣政策由中性轉向寬鬆，而全球最強貨幣美元升值的大趨勢仲係不變，上周中國公布的二月貿易數據，出口大升，進口大跌下，外貿盈餘創歷史新高，換句話，人仔要提高貶值幅度及速度知易行難，難怪唔少基金都驚今次阿爺透過減息或降準，出招太遲而狂掟中資股。

講番個市，周一叫大家睇番幾隻賤過地底泥的手遊股，IGG（08002）前日見一見4.11元，即市回番唔少，但昨日又逆市升2.1%，唔似咁快玩完，抖完氣之後可以留意。另一隻手遊股博雅（00434）收市出業績，賺2.8億元（人仔‧下同），基數低關係升1.07倍，每股盈利42.07分。去年網頁遊戲幾乎無增長，代之而起是移動遊戲營業額大升九成五至5.4億元人仔，超越網頁遊戲，現價13倍PE，估值唔貴應該仲有得玩多陣。

碧桂園業績有睇頭

碧桂園（02007）昨亦公布業績，撇除投資物業公允價值變動，以及贖回債券費用及匯兌損益，核心利潤92.4億元，升15.5%，與市場預測接近。去年公司合同銷售金額及面積分別升21.5%及21%至1,288億元及1,928萬平方米，淨負債比率降低7.6個百分點至59.7%。

去年中央壓抑樓價措施初見成效，調控措施已見急急撤離，在經濟吹淡風下，中國房地產調控已經唔存在，但管理層還是訂出一個相對保守的全年銷售目標，只比去年多4.8%的1,350億元。

基於一、二線及三、四線城市銷售各佔一半，內地非核心城市庫存過剩問題嚴重，今年對後者銷售毛利應有壓力。近日兩會上，中國強烈顯示出穩增長決定，樓市在阿爺力托，樓價跌幅可能比市場預期輕微。雖然公司訂得銷售目標低咗啲，單位數盈利增長是合理推測，現價2.98元（港元‧下同），較重估後的資產淨值折讓五成二，應足夠反映樓市轉弱風險。近期一二線城市樓價有拗腰回升之勢，3元附近有一定值博率，去年十一月減息前低位2.82元，可以作為投機者的止蝕位。

電訊股開創新局面

聯通（00762）及中電信（00728）啱啱先有FDD 4G牌，中國信息通信研究院發布數據，二月全國手機出貨量2,452萬部，按年升14.4%，其中2G及3G出貨量251萬及181萬部，4G出貨量2,020萬部，按年勁升10.6倍，終於成為主流。調查機構IDC預測，今年中國智能電話付運數字將會達到5.5億部，比舊年勁升三成，相信4G手機普及，以及三間電訊商終於齊齊擁有4G經營牌照唔使讓賽，上客表現應該會再一次洗牌。

都係嗰句，在下認為聯通及中電信有條件扭轉捱打局面。睇番聯通股價自二月中高位13.36元，獲發FDD 4G牌之後基金大戶趁好消息出貨，跟住個市級級落，昨低位11.62元，高位回咗一成三，或者去年10.04元起步位累積升幅的五成二，等低吸的，應該可以開始買第一注。

古勝