絲絲講場：買不良資產都算淘寶？
淘寶乜都有，連專門處理不良資產嘅中國信達（01359）都潮起嚟，首次喺淘寶放咗幾項壞帳資產畀人淘，競價八粒鐘已有超過5,000點擊，其中兩項成功賣出，仲有幾口叫價。
不良資產，即係啲到期但未收番嘅貸款或應收帳、積壓嘅呆滯物資或投資之類，總之係唔多周轉到嘅資產；而信達嘅主業，簡單講，就係以折讓價收購企業啲不良資產返嚟，搞搞佢再套現賺錢；即係好似你平平哋買架就咁睇冇乜人吼嘅二手車番嚟，執靚佢，又或索性拆件，再賣番出去。
信達成功賣甩兩壞帳
信達今次喺淘寶成功賣出嘅，係兩家內地公司嘅壞帳資產，一家喺浙江，一家喺寧波，成交價分別係2,005萬同441萬人仔。
今次係信達第一次經淘寶處理壞帳，連德銀都出報告讚好，話顯示到信達有意擴大二級不良資產市場嘅出售渠道，又話透過淘寶賣增加咗透明度，而且覆蓋更多潛在買家。
信達今次用嘅，係淘寶近期搞出嚟嘅資產處理平台，雖然人流未及零售平台天貓咁墟冚，但勝在資產夠爆，由起拍價五百蚊人仔嘅iPhone 5，到幾百萬嘅城商銀行股權，甚至成千萬嘅飲品生產知識產權，都有得淘。
車樓舖位乜都有得賣
入駐得呢個淘寶資產處理平台嘅機構，來頭唔細，除咗信達，仲有招行（03968）廣州分行、民行（01988）上海分行、前海金融交易所等。連官方機構亦撐場，中山市地方稅務局與北京市高級人民法院有資產要甩手，都用到佢，單係司法機關就已經擺咗80件資產等放，多數係查封番嚟嘅二手車與二手樓。
有興趣北上買車買樓嘅港人，可以考慮吓司法機關啲貨，近近哋中山與珠海嚟緊都有住宅同舖位拍賣；不妨開定個淘寶帳戶、支付寶充定錢、或綁定張內地銀行卡，隨時淘。話時話，仲有乜喺淘寶買唔到？絲絲估係感情啩......
余絲韻