尋日係長和系旗下泓富（00808）業績會，泓富每基金分派按年多咗9%，「樓神」趙國雄笑住話佢自己嘅私人投資上年都冇9%增長咁多。私人投資？絲絲當然唔放過，追問吓佢有乜心水。或者關元宵事，佢竟然有問必答！
佢話自己主要投資喺一啲風險資本，而呢個風險資本係由佢同佢夥伴操盤，主要投放喺啲初成立嘅科技公司，目前已經投資咗有13至14間內地公司，每間投放咗大概50至100萬元，呢啲公司有部分搞緊下一代自拍神棍，有啲做緊新一代航拍機器，要遲下先至有得賣。
佢呢個風險資本，最近甚至走入以色列搵投資機會。趙國雄話，以色列科技非常先進，所以平均投入嘅資本大啲，每間公司要成100萬美元。又係投資以色列？方向同佢老闆李嘉誠間維港投資一樣喎。
余絲韻