絲絲講場：滙豐黃碧娟：人和最重要
滙豐趁住慶祝成立150周年，一於有咁大搞咁大，今輪贊助海事博物館搞個專題展覽，畀大眾細味吓香港故事添！昨日集團大中華區行政總裁黃碧娟（Helen）致詞嗰陣，仲特別強調「人和」嘅重要性；不過聽到佢咁講，絲絲就替佢老細歐智華同范智廉擔心，皆因呢排好多人叫佢哋落台！
歐智華范智廉周身蟻
Helen話滙豐一路陪住香港成長，到今時今日都仲有好多人叫滙豐做Hong Kong Bank，佢覺得好自豪。佢仲引用古語「天時不及地利，地利不及人和」，強調「人和」對香港同滙豐發展嘅重要。
不過滙控（00005）要做到人和就似乎難咗啲，皆因Helen嘅老細歐智華同范智廉呢排因為避稅事件而搞到周身蟻，聽證會一個接一個。
最慘情係畀人圍插，連英倫銀行副行長貝利都開到口叫佢哋負責任，話唔好推卸畀下屬咁話，落台壓力又大咗。
余絲韻