絲絲講場：梁永祥管代理出甜招
尋日係元宵佳節，即係中國情人節。新上任嘅地產代理監管局主席梁永祥就趁尋日應節大派金磚朱古力，實行政府出辣招，佢出「甜招」為地產代理打氣，佢仲有幾番「情深」嘅說話，要透過絲絲同啲代理講喎。
金句鼓勵捱過低潮
梁永祥昨大派滿載朱古力嘅「999有福金磚」，雖然金磚係派畀傳媒，但佢心裏掛住嘅其實係啲代理，佢話金磚寓意業界「金章專業」。得得得，幫佢向代理「盡訴心中情」呢啲粗重嘢，等絲絲嚟做。
啲金磚裏面除咗有朱古力，仲有啲好有內涵句語嘅小紙條，出自《周易》、《禮記．學記》、連美國已故總統林肯嘅名句都有。代理們，收到冇！
政府出招，梁永祥話一錘打落嚟會痛一陣，市場需要時間適應，但代理幾經風浪，就算對上一次出招，一二年物業交投由8.1萬宗跌至一三年5萬宗，但近年持牌人數維持約3.5萬人，未會調整牌費。
佢又話，透過培訓同教育，上年投訴數字跌至399宗，比一三年494宗少約百宗，今年首兩個月就有50宗，其中8宗與新盤有關。
財金界點慶元宵？
趙國雄歎巨型湯圓：長實（00001）執行董事趙國雄話，會成家人一齊食鹹湯圓，係佢鄉下常州正月十五嘅傳統。甜湯圓絲絲食得多，鹹湯圓？佢話係用碎肉做餡。仲有，佢家鄉嘅湯圓仲大粒過乒乓波，佢食兩粒就飽。正月十五，人月加埋乒乓鹹湯圓三團圓，有意思。
李焜明過二人世界：BWC寶華世紀資本市場研究及市場企劃傳訊部執行副總裁李焜明已提早一日同太太慶祝，兩口子前晚喺中環Cafe Landmark燭光晚餐。尋晚就喺屋企晚飯，有太太愛心靚湯，絲絲覺得仲浪漫！
申銀萬國研究（香港）研究部主管陳鳳珠就睇日曆先發現尋日係元宵，佢尋晚同班金融Friend食西餐，有男有女，不過唔關元宵事。睇嚟後生仔心中只有二月十四日。
鄭偉文忙到「無着落」：泛亞環球物業區域銷售總經理鄭偉文話「無咩着落」，而佢同事常務總監馮得海亦一樣，話「要同Wellman（鄭偉文）Confirm先喎！」呢啲日子忙工作，唉，絲絲好明白。
余絲韻