Market Insight：長汽等調整上車

基金經理掟指數股愈掟愈起勁，主板成交在跌市中不跌反增，去到921億元，啱啱係一個月以來新高，拖累指數最多嘅滙控（00005），70元散戶血肉長城失守後，有點江河日下感覺，昨再跌0.5%收報67.9元，口痕友話滙控捧場客沽咗股票去炒150蚊紀念鈔好過。

先要挽救市場信心

兩會揭幕，總理李克強發表政府工作報告，指今年中國經濟增長目標下調到7%左右，增幅目標創下一九九九年以來最低，難怪近三個月以來，減息、降準、逆回購，擺出一幅亂石投林，乜招都出齊的姿態。

不過，其實唔少大行策略師，對今年中國GDP估得比官方數字更低，平均係講緊6.8%。睇怕中央全面放水救經濟，首要係救救市場信心，暫時唔想發布太負面訊息，先定個中性些少增長目標，年中達唔到標，學似舊年向下修訂嗰招都未定。

前央視主持柴靜製作關於環境污染的紀錄片，喺周初環保及再生能源股炒一浸靜落嚟，趁兩會召開又再開波，最誇張隻漢能薄膜發電（00566），昨日再升14%收報7.3元，同上周五收市價4.52元比較，短短四個交易日升咗61%，市值再發育升到3,041億元，市值已多過中電（00002）逾千三億元，認真誇張。

古勝冇點你

萬里長空

睇番漢能一四年中期業績只賺17.3億元，當佢全年可賺35億元（中電全年盈利112億元三分一亦唔到），講緊係76倍PE，本身貨夠乾，逐浪者畀心口個勇字遮埋隻眼之外，都搵唔到其他理由解釋點解咁升法。睇嚟人行減息，基金經理聯袂炒家狂掟中資金融保險股提款之後，錢多身痕要搵故事落鑊。

提防芬佬隨時提款

昨日漢能的炒風更擴散到其他太陽能股身上，君陽（00397）狂升70%、陽光能源（00757）升24.5%，卡姆丹克（00712）升9.4%，聯合光伏（00686）升6.2%，連成日見拉牛上樹的保利協鑫（03800）都升3.8%。古勝抱住唔識唔買心態，但都戥趕到上車股民高興。

新能源股唔少對沖基金經理鍾意當佢ATM咁，往往炒一陣跑夠數就散晒，看官們謹記音樂椅遊戲一完要識落車。

中央工作報告話今年要做好節能減排，減低二氧化碳排放，推廣新能源汽車，加快老舊車輛淘汰，簡直就係同推廣比亞迪（01211）一樣。昨日比亞迪A股（002594.SZ）升停板，H股亦都誇張，由中段爆升高收，報37.35元升6.1%，股價較月初累積升近十蚊。

上個月先提過，比亞迪自稱加速快過保時捷的新混能車「唐」，傳聞中的頂級版本定價去到60萬人仔，國產車之中真係唔講得笑，價錢幾乎係長汽（02333）哈弗H6頂級版四個開咁滯。到底中國人為環保可以付出幾多？相信會是一大測試，但股票唔理三七廿一，通常係先炒為敬。

講開車股，近月中國自主品牌市佔率升番，長汽「火鳳凰故事」應該最吸引基金眼球。唔覺唔覺股價由舊年十月30元水平起步，輾轉都升咗五成六。

混燃車價格更吸引

長汽啱啱出咗二月銷售數字，春節淡市，賣出5.18萬輛，按年升3.4%，累積首兩個月則賣13.9萬輛，按年升16.8%。新款SUV哈弗H6繼續賣得唔錯，兩個月賣出5.6萬輛升31%，佔總銷售數字四成，開賣不久的高檔哈弗H9，亦開始漸入狀態（摩通年初估佢可以去到每月1萬輛的銷售水平），而今年較後時間，仲有H8及混燃H7新款推出，食住油價回落SUV銷情熱爆呢個勢，今年的銷售增長是值得期待。

最快於下半年推出的混燃H7，同分析員放風售價會係16萬至18萬人仔，同比亞迪「唐」入門版相比低一截。如果要搵節能減排概念又唔想畀太高溢價，不妨諗諗長汽，至少佢一五年PE得10.5倍，以今明兩年35%及18%預期盈利增長率，現價唔貴，有貨可續持有，無貨可以等45元上車。

古勝