絲絲講場：陳坤興出山 開百間經紀舖
政府連番加辣，不過，似乎內地資金仲幾睇好本港樓市，物業代理市場更加出現新勢力。好似一三年離任嘅美聯物業前執行董事陳坤興，最近領軍出任Q房網香港區董事總經理一職。
Q房網揸旗 對手唔擔心
佢同絲絲講，今次已部署咗半年，Q房網計劃兩年內喺香港開設100間分行，目標請2,000至3,000人手，除咗搶攻一、二手住宅市場外，仲會打入豪宅同工商舖物業市場。
佢話已經喺港九新界落實租咗至少20個舖位，又租咗一個逾8,000方呎港島區海景寫字樓做總部，初步已投資超過5,000萬元，最快五月開幕。有消息話，佢第一間舖會開喺尖沙咀柯士甸道。
絲絲反而有興趣啲對手點睇。中原亞太區住宅部總裁陳永傑話歡迎，佢話依家係網絡世界，以網絡形式加入，符合潮流走勢；美聯集團董事總經理黃子華話，有新經營者加入係好事，有助提升行業質素，唔擔心造成競爭。真的嗎？
余絲韻