神都有犯錯時候？股神巴菲特喺一年一度嘅股東信中認投資犯錯，一個錯佢用咗廿年去糾正，另一個錯就令佢唔見咗1千億美元！
第一個錯係鬥氣鬥返嚟。一九六二年股神買咗間紡織公司嘅股份，揸咗兩年，大概持股7%，紡織公司原股東Stanton有意向巴菲特買番啲股份，雙方明明講好咗每股作價11.5美元，點知Stanton轉個頭反口，只肯畀每股11.375美元。其實巴菲特都賺硬50%，但佢條氣唔順，唔單止企硬唔賣，仲不斷Chur住加大入股。
股神廿年後結束該生意，間公司亦變成多元控股公司。可能為咗永遠記住呢個教訓，股神Keep住用呢間公司個名，即係依家係人都識嘅巴郡！
第二個錯發生喺一九六七年，巴菲特用860萬美元向佢老友Jack Ringwalt收購保險公司National Indemnity Co.（NICO），單Deal佢老友明益佢。但千錯萬錯，巴菲特無用到自己間投資旗艦Buffett Partnership Ltd.，反而用咗當時好唔掂嘅巴郡去買。由於巴郡當時仲有其他人揸手，佢就眼白白睇住1千億美元流入人哋荷包。
余絲韻