絲絲講場：女董事比例 港勁落後

東亞騰訊核心「零」女性

本港上市公司女董事人數增長緩慢不單止，有七間藍籌包括騰訊（00700）、煤氣（00003）、東亞（00023）等，過去七年從未委任過女性出任董事，拖累本港表現追唔上其他國際市場。一個字：醜。

根據社商賢匯最新報告，恒指成分股企業中，女性董事比例首次錄得雙位數增長，由往年嘅9.6%增至11.1%。

不過，咪開心住，呢個所謂雙位數增長，其實只係由滙控（00005）、領匯（00823）、潤電（00836）等少數幾間公司帶動，仍有四分之三公司嘅女性董事比例毫無改善！而香港嘅呢個11.1%所謂嘅增長，同國際比，明顯遠低過挪威嘅40.7%、英國嘅23%、美國嘅20.8%，甚至差啲輸畀馬來西亞。

社商賢匯行政總裁魏余雪奕話，對於香港增長速度好失望，「女性仍然面對緊文化上嘅阻礙，否定女性可全面參與香港經濟增長，而且排斥佢哋擔任決策者嘅職位。」

佢又話，類似東亞呢啲家族企業，問題尤其嚴重。難怪東亞今次喺榜上直頭係包尾。香港要保住國際金融中心嘅地位，睇怕要做啲嘢，否則，危。

余絲韻