期指觀瀾：乏力向上睇位做淡
羊年第一個交易日，A股未復市，港股成交疏落，吹着無定向風。恒指開高84點，以24,916點開出後，未幾被獲利沽盤影響，指數最低見24,664點，在開市不夠半小時，全日高低位已出現之下，餘下時間指數逐漸收復失地，但動力明顯不足，午後恒指最高見24,854點，收報24,836點升4點，主板成交僅493億元。
即月期指日市收24,863點高水27點，但收市後滙控（00005）業績差過市場預期，夜期早段跌過百點。港股拉牛上樹錄得六連升，昨日指數見24,664點低位後拗腰，跌幅收窄，守住10日線，可見交投不足，就算睇淡短期大市的大戶，亦不敢肆意出手。
滙控會否成為短期調整最後一根稻草？睇番股價一月下旬見69.75元的兩年新低後，反彈至73至74元已見明顯阻力，如果70元頸線再失守，好大機會向65至67元方向進發，對大市造成一定壓力。
另外，國企指數尚未升穿12,090點收市，打破近兩個月以來浪頂下移的形態，昨去到12,083點又遇阻力，港股已處於相對高位而缺乏動力再上，個人感覺周三A股復市，港股借勢調整機會為大。今日會嘗試在24,750至24,850之間開淡倉，止蝕暫訂於24,975點。
John Mullen