孖妹S檔案：花紅投資錢搵錢

公司派花紅同埋加人工，可以話係打工仔喺新年前後最「滾動」嘅事件之一，孖妹收到花紅後簡直係如入無人之境，即時飛去東瀛瘋狂掃貨。事實上，金融界花紅出名豐厚，今次我哋實行八盡香港金融財子財女嘅吸金成績表，當然唔少得向佢哋嘅花紅投資策略偷師！

阿爺力撐 A股有排升

林：晉裕環球資產管理投資研究部董事林偉雄

林：我公司舊年十二月底出花紅，晨早使晒啦！

Kitty：你……份人咁有紀律，我以為……

林：講笑咋！我哋嘅花紅金額係同公司盈利掛鈎，個人花紅有六位數字（即以十萬元計），不過就冇乜發達大計，而且兩個小朋友都仲細，唔啱去旅行住。好多行內人都用花紅去「濕平」，獎勵吓自己，有啲兩公婆買番對情侶錶，不過就梗係唔係買Casio咁簡單，哈哈。之但係內地銀根鬆動咗，為A股市場增添牛氣，我「心郁郁」想長線投資A股ETF（交易所買賣基金）當儲錢。

彩兒：內地近期經濟數據孱過孱仔強，你仲長揸？

林：我無論長、短線都睇好A股o架！短線睇，內地放鬆銀根，投資氣氛暢旺，A股仲係環球估值至平嘅市場之一，不知幾吸引；長線睇，經濟數據「唔靚仔」，阿爺就實會做嘢，用政策支持經濟，再講近期內地CPI（消費物價指數）似偏軟向下，中央喺冇通脹壓力下就可以大刀闊斧推鬆綁政策。華夏滬深三百指數ETF（03188）可以話係收花紅或中六合彩後最好嘅投資選擇，貪佢行業分布夠分散，覆蓋範圍又廣泛。

候內地經濟調整即吸

黃：中原資產管理高級副總裁黃安盈

Kitty：做女人點可以「唔化」，你實有拎花紅嚟扮靚靚啦。

黃：舊年主要係上落市，唔似前年咁好景，我嘅佣金連表現費大約80萬元，冇前年過百萬咁威，不過我仲尋覓緊Mr. Right，對另一半咁有要求，當然對自己都要有要求啦，所以都有投資喺自己身上。女性增值唔單止靠資產增值，平時一定唔可以虐待自己！我舊年第四季一出Bonus，就將佢分咗做三份，用嚟交稅、投資，當然唔少得Renew番啲Facial同瑜伽計劃。

彩兒：女人有大大舊私己錢，自然安全感都大啲！

黃：無錯，我一出Bonus就即做投資，好勤力。我平時太忙，掛住盯實啲客嘅投資組合，冇乜時間管自己個組合，所以會專買大型股長揸。舊年十二月比亞迪（01211）曾經跌到十幾蚊，我喺佢反彈至27蚊入咗貨，除咗比亞迪，我仲揸緊長城汽車（02333），老實講，內地汽車股業績一啲都唔好，我主要係貪佢間中有國策扶持咋。

另外，A股舊年底升幅勁得人驚啊！顧及內地經濟改革現曙光，所以佢一有調整就會吸納，咁啱出Bouns就撞正大調整，點都要入貨，如果唔係就對唔住自己啦，我主打買入南方A50中國（02822）同埋認購A股基金。

美息慢慢上吼高息股

冼：御峰理財董事冼康怡

彩兒：聽聞你哋一月尾就出晒花紅，Fing晒未？

冼：我哋公司今年平均有一至兩個月花紅，個人就有兩個月，一收花紅梗係要保留部分嚟交稅啦，等佢救命！剩低嘅就打算儲起佢。

我本身多數會拎花紅嚟投資，不過舊年睇準西營盤有港鐵概念，拎咗部分花紅幫補做首期，買咗個300萬元嘅單位做收租婆，租金回報率有3.5厘，另外仲買咗車，同去咗趟馬爾代夫同陽光玩遊戲，所以今年咪儲起花紅先，要忍忍手！

Kitty：你原本好似有投資好路數o架噃！

冼：美國今年大機會加息，但環球經濟弱勢，四至五月股市會較波動，顧及全球股市六年來都未有過大危機，所以一旦有大調整時或者係入市良機。我估計，美國加息取態溫和，年底未必過到一厘息，可候低吸股息率有4厘以上，對經濟周期敏感度高的高息板塊，例如石油、工業及電訊。

澳洲息匯雙低啱買樓

李：灝天金融副總裁李卓峰

彩兒：你舊年花紅連佣金有過百萬，有乜錢滾錢大計？

李：因應澳洲再減息空間唔大，而且澳元匯價已低水，我預計今年該國央行再減一兩次息就會平穩，而我有家人喺澳洲，第日仲有可能畀小朋友過去讀書，所以將嗰筆收入嘅五至六成調咗去當地投資Pre-IPO（股權配售）同埋房地產。

Kitty：傳說中嘅隔山買牛，點先買得中「肥牛」？

李：目標樓盤係墨爾本同悉尼等中心地帶嘅學校區，現時好多盤喺成交首兩年都提供4至5厘嘅租務回報保證，嗰邊有朋友幫手做Research，不過依家都仲係物色當中，遲下有啱心水嘅物業就會親身飛過去睇樓，當去旅行！其實早一、兩年都有留意過日本樓，雖然好多盤有7厘租金回報保證，但係蝕匯水幅度遠高於物業升值幅度，所以即時Say No。

我有朋友喺澳洲做上市保薦人工作，一有業務具特色概念嘅公司計劃上市，佢就會Send資料畀我睇，參與配售入場費大約50萬至60萬港元。我早前投資嘅醫藥股，未計及匯價因素，沽出獲利20至25%；近期就投資咗一間主力做WiFi業務嘅公司，公司四月先上市，到時先知成績喇。