Market Insight：油企重組 長炒長有

今日係踏入羊年的第一個交易日，古勝先同大家拜年，祝大家今年股場得意，順風順水！

過去幾日香港魚缸假期，A股休市時間又比港股長，市場焦點落在希臘同歐洲央行的談判上，一眾花生友，當然唔想見到以和為貴的結局，不過最終結果，卻係有如港劇一樣，未睇開頭已經知道結局，歐央行同意延長寬限四個月。

古勝冇點你

萬里長空

不過，由於希臘莫財也是事實，因此這齣脫歐鬧劇，恐怕會同荷里活漫畫英雄電影一樣， 會無限開拍續集，隨時兩、三個月之後，又會再同歐央行吵吵鬧鬧過。

美股好友勝一仗

希臘大步檻過，刺激美股做好，道指破埋萬八點，上周五收18,144點，升154點創歷史新高。道指經過兩個多月喺上限18,103點同下限17,037點之間的橫行爭持，終於見好友技勝一籌。難得十年美債息，個多月之間由1.65厘彈番去上周五的2.13厘，反彈近半厘，股市開始接受聯儲局嚟緊的議息聲明，可能刪除就加息方面「保持耐性」的字眼，為下一步加息，做好心理準備。

馬年最後一個交易日，港股得半日市，由於基金經理大部分收爐放假去，令成交連300億都唔夠。不過，個市靜局反而益咗期指散仔，用少少銀両逐少逐少咁托起指數，最後達成五連升，恒指收報24,832點，升47點。三桶油受重組消息支持下，國指收12,066點，升67點。

總結馬年恒指累漲2,796點或12.7%，國指升22.8%。雖然喺動物世界，馬一定跑得快過羊，但有趣的是，過去三次羊年，港股唔單止升，仲係勁升，○三年羊年經歷後沙士年代，升48%，九一年羊年升36%，再耐少少，七九年羊年恒指升咗80%。

雖然無科學根據話，呢類統計會歷史重演，但睇見之前幾個羊年升成咁，對今年港股，多少都會有所期望。

A股羊年有睇頭

去年底中國政府終於接受現實，唔能夠單以經濟質量優化去支持就業，推動經濟，終於都要行番舊路，推動「一帶一路」，以鐵路、基建投資推動經濟，配以水喉大開，取消大部分城市的樓市調控措施，兼要求銀行要為新買家提供按揭方便。基本上，可以出嘅招都出齊。

儘管A股經歷去年第四季狂升後，近日在成交萎縮下，作勢需要先來個合理調整，但放水保七的大前提下，今年中國全面加入貨幣戰爭，貨幣政策由中性轉至寬鬆，投資環境改善是值得期待。

講番上星期個市，外媒引述消息人士話，應中央要求，中國經濟智囊提出多個與國際巨型石油企業抗衡的辦法，包括將幾間早就壟斷內地市場的石油巨無霸進行合併，中石油（00857）併中石化（00386），中海油（00883）則與中國中化集團合併，消息令幾隻股票得以在馬年埋個靚齋，勁升收場。

先唔講呢幾間巨無霸，業務規模其實同國際對手不相伯仲，在本土市場亦已經徹底壟斷，還有沒有合併節省成本的可能，值得商榷。但今次的事件可以證明一點，就係北京對於內地石油石化企業的盈利能力同管治效益，仍然係十分重視。

小弟估計消息未必空穴來風，但相信會係極為初步階段，股市反應咁大，純粹因為油價跌了近大半年，石油類股份大弱勢累積淡友唔少，於是藉一個正面消息挾淡倉所致。

油價具反彈條件

話說回頭，早排中海油公布今年資本開支預算，比去年減少兩成五至三成五之間，創三年新低，隨住國際油價大插插，油企都紛紛以縮皮減低產量增幅作應對，而國際油價已經遠低過OPEC眼中釘，美國頁岩油每桶成本70至80美元水平，一旦減產同減資本開支的效果浮現，油價有條件來一次似樣的技術反彈。

而在三桶油當中，論勘探能力及資本開支彈性，以中石油最理想，如果短期守住8.8元左右跌唔落，可以密切留意。

古勝