港交所（00388）今年於大年初五開市，主席周松崗同行政總裁李小加例牌化身財神，向出市員大派利是！不過，絲絲聽聞，今年派出的「大牛」500元利是數目，會較去年少一半喎，得番10封！唔通港交所都想「縮皮」？
港交所過去兩年，都係派20封「大牛」500元、同10封「金牛」1,000元利是。但今個羊年，只會「大牛」、「金牛」利是各派10封。
咁點解今年會少咗「大牛」利是？原來係因為港交所出市員數目買少見少，往年有成100人，派30封「大利是」，約有三分一人有大利是。但今年出市員得番60幾人，派20封「大利是」，同樣係有約三分一人有機會抽中「大利是」。所以港交所都唔係縮皮嘅！事實上，佢哋當日仲會派出大量50元利是，人人有份，永不落空。港交所淨係派利是，年年都派成幾萬元！
除咗派利是呢個指定動作外，羊年開市儀式，仲玩驚喜添！港交所今年會邀請「特別嘉賓」嚟開市儀式中表演。係咪好想知邊個係「特別嘉賓」呢？絲絲畀個貼士大家，一定唔係小加總裁！
余絲韻