港股全日成交僅逾500億元，多隻大價股波幅僅數格，就連落行散戶都少咗，假日情緒浮晒上面。
英皇證券荃灣分行經理高初定表示：「有散戶昨日『係咁意』買咗啲中資金融股，例如建行（00939）、國壽（02628）等『例牌』股份。雖然未到價走唔到，但佢哋相信內地遲早都會減息，所以股價走勢唔會太差。」
農曆新年前倒數最後三個交易日，股友去晒辦年貨，港股淡靜早已預料之內，但有幾隻零售股忽然大升，唔通咁快反映到港人消費情緒高漲？致富證券觀塘分行經理謝少淵稱，零售股份如先施（00244）及先施錶行（00444）分別升12%及逾7%，算是為平淡消費市道沖一沖喜。