孖妹S檔案：洋大師預卜 港股超旺

羊年多大漲今年看升兩成

J H：《股票交易員年鑑》（Stock Trader's Almanac）主編 Jeffrey Hirsch

Kitty：臨近歲晚，孖妹一早已經收晒爐專心扮靚，打算過埋農曆新年假先重投魚缸懷抱。咦，你本股壇通勝喺二月二十三日（年初五）有個「牛頭」，係咪代表美股嗰日牛氣沖天宜入市？睇嚟港股羊年都會有個好開始！

《股票交易員年鑑》	過去三個羊年港股升幅	恒指44年來各月份整體表現（由1970年至2014年11月）

J H：無錯，有牛頭嘅交易日，喺過去21年來標指平均升最少60%。嗰日入市，勝算都高啲！我研究市場及季節性周期逾廿年，運用歷史數據預示每年股市行情，最近仲開始研究恒指走勢，發現佢都有自己獨特周期。受農曆新年樂觀情緒影響，恒指每年二月表現特別好，過去44年平均升幅達3.6%，係全年表現次佳月份。

美股料先破頂後大跌

彩兒：聽落同A股「二月效應」幾似喎。但港股二月初至今只微升0.72%，睇嚟要再發力先得。

J H：港股每年「連環強勢三串燒」係十二月至二月，同美股唔同，美股係十一月至一月。雖然恒指去年十二月跌1.5%，但上月已回升3.8%，相信二月可以再下一城、延續升勢。

Kitty：馬年恒指未有如駿馬般奔馳向上，希望羊年可以靠隻「咩咩」追落後啦！

J H：羊年係中國生肖周期中，恒指表現最好嘅生肖年，過去44年嘅三個羊年都大漲收市，平均漲幅有51.5%，意味港股今年或同樣大漲。我相信恒指仲未見頂，今年更有機會試闖繼○七年後嘅新高峰。不過，礙於全球市況波動，港股升勢受壓，估計20%升幅較為合理，係恒指嘅歷史平均漲幅。

彩兒：我哋平日睇嘅通勝，啲行內術語多到記唔晒。咁你呢本通勝又有咩咁特別，令大家封佢為「投資聖經」？

J H：佢由一九六七年出版至今從未間斷，詳細列出各類指標、各年份及特別交易日嘅升跌紀錄，覆蓋時期逾百年。為證明歷史數據有一定參考價值，我平日買賣股票都會用佢，去年回報有7.7%，上月就差啲，蝕咗2%，但表現依然比大市好。

Kitty：股壇通勝指今年利好因素多，美股或漲一成以上，但上月已「出師不利」跌逾3%，如「一月效應」奏效，今年應該跌市收場。到底升定跌啊？大師請指點迷津！

J H：歷史數據只係預測大市方法之一，實戰時都要運用技術分析同觀察宏觀市況。我認為今年不利因素比以往多，尤其預計今年聯儲局加息，加上全球局勢混亂，令股市波動加劇，唔排除聯儲局「出招」後，美股會有大調整。

但至少上半年依然安全，美股甚至有機會破頂，預測道指及標指上半年可分別高見19,000點及2,250點；喺大調整後，股市將反覆向上，最終高收。

彩兒：睇怕都無乜邊個神算好似你咁誠實，叫人唔好信晒通勝。建議你編多本專講恒指走勢嘅港版通勝，一定大賣！

Kitty、彩兒

若有料報畀彩兒同Kitty或有嘢問，可電郵money.biz@opg.com.hk