農曆新年將至，內地一班科網巨頭又掀起一陣利是攻勢。之不過，支付寶發紅包就激嬲咗一啲網友，網友有唔滿意會點？梗係P圖惡搞啦，搞到阿里急急發聲明，求網友唔好鬧得太狠！
阿里喺今個月十一號至十九號期間，會送出價值6億元人仔嘅紅包，抽中嘅網友滿心歡喜以為執到寶，點知發現大部分都唔係現金，只係啲好睇唔好用嘅優惠券，擺明只係吸引人又去佢個網度Shopping啫。
有網友嬲嬲哋索性將紅包改圖，變做500萬元嘅現金券，但只可以買波音747飛機。一架波音747閒閒哋都要1億5千幾萬美元，就算好彩搶到紅包，買隻機翼都未夠喇。網友P圖嚟諷刺阿里，勁有創意，所以話，莫得罪網友。
余絲韻