Market Insight：恒生賣產彈藥充足

不過，話說回頭，在G20敦促其他國家唔好有樣學樣，其實都不難理解。踏入一五年，黑天鵝事件頻生，全世界央行爭先恐後放水，先唔計丹麥、瑞士、南韓同新加坡央行，單係歐、中、日央行都齊齊打住寬鬆貨幣政策牌，掉轉頭，到最先出現復甦，預期今年息口可能回到正常化的美國，面對匯率升值壓力及經濟復甦風險日漸加大，一架車四條胎得一條有氣，可唔可以開得快，大家心裏有數。

仲有五個交易日先放假，港股節日氣氛濃厚到極，基金經理入市意欲急降，形成交投愈玩愈縮，恒指昨日插213點收報24,315點，主板成交646億元，是一五年第二低。跌市火車頭滙控（00005），插低2.2%收70.25元，沽家一度攻入散戶於70元築起的血肉長城。

古勝冇點你

萬里長空

大象股價先受懲罰

周日滙控被國際偵查報道記者聯盟發表名為「瑞士解密」調查報告，指旗下瑞士私人銀行涉嫌幫客仔逃稅，大笨象高層未審先認，承認之前監管有所缺失，擺出一副投降姿態，看來已打定輸數。睇嚟好快收到西方監管機構張罰款單，唔知今次又要揩幾多。睇過去兩日股價隊低2.55元，已經相當於市值蒸發490億港紙或者62.8億美金。

跌市中，還有個別奇葩，例如發盈喜預告由一三年虧損中回到盈利的TCL多媒體（01070），原因係一四年上半年有一次過收益入帳，而本身核心業務經營狀況有所改善，昨股價抽升9.6%至4.08元創52周高位。睇番首三季已賺2.27億元，三個月股價升近六成，市值去到54億元，感覺係第四季業績要相當石破天驚，至有再買價值。

昨日中午出成績表的安踏體育（02020），股價玩半日升6.8%至14.1元，全年業績賺17億元人仔，升29.3%，每股賺68.12分，貼近市場預期上限，末期息28港仙加送8港仙特別息，連同已派的中期息合共61仙，股息率4.3厘，對好息之徒，也相當具吸引力。

安踏尚有重估空間

安踏業績其他搶眼之處，例如差異化及高性價比產品比例提升，毛利率改善3.4個百分點至45.1%，存貨周期及應收帳周期繼續見改善，店舖重整，關掉效益較差的門市措施已近尾聲。看過一五年的預測，似乎被大行重估的空間仲存在，股價應該仲有一兩棍炒上去。

恒生（00011）終於揭開同興業銀行（601166.SH）分手的序幕，透過高盛高華批售手上5%興業銀行股份，套現127.3億元人仔（約157.9億港元），交易後仍保留5.87%股權，九成九分析員都估未來恒生會逐步沽清。消息後股價反高潮，昨跌0.6元收142.2元。

一來之前傳沽興行已經炒咗一浸，另一原因是唔少人原先估恒生一次過沽清後會派特別息，但依家沽唔晒，當然有少少失望。

計計數，今次套現後，恒生一級資本比率一下子升近4.1個百分點去到13.5%樓上，高過恒生計劃的12%，但早排金管局放晒風，可能建議部分本地銀行因應美國退市，預留反周期緩衝資本2.5%，恒生又可能被列為受影響的系統重要性銀行，博派息的，睇怕要等下一輪沽貨至有機。

外資紛紛擸錢分手

話說回頭，過去幾年外資在內地銀行業，可謂有出無入，紛紛把投資收割。好似美銀沽盡建行（00939），高盛亦同工行（01398）分道揚鑣，西班牙對外銀行（BBVA）亦打晒開口牌，隨時會沽中信銀行（00998）。

今次恒生沽興行一啲唔叫人意外。一來國際金融巨擘齊齊去槓桿，減持非核心投資已成大趨勢，而內銀本身暴利年代亦告一段落，低經濟增長、資產質素轉差及利率市場化，內地銀行業在外資眼中，連雞肋都不如，以往話藉住入股引入西方管理，幫外資股東打入中國市場，只係美麗誤會，從無發生過。

依家個個放長雙眼，睇吓滙控同交行（03328）幾時各行各路，既然恒生都沽，睇嚟只係遲早問題。

古勝