絲絲講場：長實「八仙」賣樓各顯神通
羊年就快嚟到，長實（00001）尋日舉行一年一度新盤巡禮推介活動，仲趁呢個機會同大家拜個早年。今年嘅主題係「八仙過海、各顯神通」，素來有「百變樓神」之稱嘅集團執行董事趙國雄，親自率領一眾營業部高層粉墨登場，以唐裝衫配合Q版「八仙」紙牌造型出場，絲絲仲觀察到現場更大放乾冰營造好似仙境嘅氣氛。
趙國雄芭蕉扇打氣
每位「八仙」成員出場時，都手持法寶帶出自己負責的樓盤特色，手持芭蕉扇嘅趙樓神貫徹佢一貫嘅鬼馬本色，笑住咁話希望用把扇為各位揸盤人打氣之餘，仲想將社會上唔開心氣氛掃走咁話喎，而在場記者離開嘅時候，個個都獲贈八仙果一個，安排夠晒貼題又貼心。
余絲韻