股神巴菲特每年致股東嘅公開信，向來被視為投資界秘笈，深受一眾粉絲、學生、企業管理層，以至投資專家追捧拜讀。適逢巴菲特入主投資旗艦巴郡50周年，據英國《金融時報》講，佢今年計劃出特別版，除原本約30頁嘅公開信，仲有股神同佢嘅長期副手芒格各自撰寫嘅評論，睇落相當有噱頭。
巴郡經過50年，由一家陷入困境嘅紡織企業，轉型成為投資控股公司，業務不但包羅萬有，仲揸住唔少藍籌企業股票，好似可口可樂、富國銀行咁，市值超越百年老牌巨企通用電氣（GE）。呢個奇妙歷程喺今年秘笈中當然會回顧一下，但更特別係佢仲會展望未來50年嘅發展藍圖。
股神今年84歲，同芒格夾埋合共有175歲，接班人選最近每一年都已成焦點，雖然股神之前講好咗日後由大仔霍華德做巴郡主席，近年又積極培養兩名基金經理，但係投資者依然未安心。呢次開宗明義講未來50年部署，必然觸及詳細接班計劃，難怪每年都會被安排喺股東會上發問嘅巴克萊分析員Jay Gelb就形容，今年嘅公開信可能係歷來最重要一份。
余絲韻