好多人都話內地網企好有米，先有百度及騰訊（00700）豪派50個月薪水嘅花紅，花紅多雖然都唔代表公司係好老闆，但花紅少就好難講得上係最佳僱主啦。內地互聯網行業近日就搞了一個「年度最佳網企僱主」評選，騰訊、京東同小米都榜上有名，但唔見咗阿里巴巴同百度。
要知道近期網上傳到沸沸揚揚，就係網企鬥豪派花紅，搞到好似玩Show Hand鬥大，除咗騰訊同百度外，小米雷軍亦許諾，若果舊年小米出機超過6,000萬部，每個員工就可獲贈一部小米4同小米板腦，連蘋果公司都唔捨得送iPhone畀旗下員工喎。
網傳阿里巴巴更豪派100個月花紅，令大家興奮莫名好一陣子，但絲絲要話畀大家聽，呢個訊息查實係誤傳，阿里要本周先會宣布花紅數目。
總言之，絲絲好有興趣了解點樣評價一位好老闆嘅準則。據主辦機構招聘網站「拉勾網」話，要獲選為「最佳老闆」，除咗要靠卓越人才戰略，造就高效、專業而激情洋溢嘅隊伍，仲要做到尊重每一個人嘅價值和創意，將企業建造成價值、情感及利益兼備的共同體，咦！好似無提到人工嘅因素。
絲絲最近聽聞一家內地大型網企嘅高管最近九年都無人工加，反而基層員工加薪幅度優於高層，老闆相信前線員工先係公司核心資產，但高層亦唔使憂心，佢哋有豐厚購股權，公司做得好就係對佢哋最大嘅回報。
余絲韻