孖妹Ｓ檔案：大鱷專家Fund析市場起伏

BS：對沖基金研究公司創辦人兼行政總裁 Brian Shapiro

對沖基金搵食艱難

Kitty：索羅斯宣布終極退休，但佢旗下隻量子基金近年表現回勇，喺一三年大賺55億美元，去年亦賺23億美元。大鱷果然係大鱷，喺業界表現不濟時依然出色！

Brian Shapiro指對沖基金看淡「金磚四國」市場。 「美國對沖基金習慣放眼全球，邊度有投資機會就會去邊度，但中國及亞洲對沖基金都明顯較專注喺本土地區……」	去年首三隻回報率最高對沖基金、一五年對沖基金投資方向	Shapiro認為行內最勁嘅芬佬係Elliott Management舵手Paul Singer（圖）。

BS：其實對沖基金賺錢與否，完全視乎舵手嘅投資策略同功架。喺任何時候，即使市場充滿變數，都總會有「芬佬」憑佢獨到嘅市場觸覺跑贏大市。可惜，呢班人已經買少見少，整體對沖基金界喺過去幾年嘅表現可謂每況愈下，甚至跑輸大市。

彩兒：點止呀，我仲知道，去年有多隻對沖基金倒閉添呀，好似BlueBay旗下宏觀基金、BrevanHoward旗下商品基金等。你喺一一年創辦嘅對沖基金研究公司Simplify，追蹤全球近2萬隻對沖基金，唔知有無發現到咩蛛絲馬迹？

平均回報跌僅賺1%

BS：據統計，去年呢2萬隻基金嘅回報平均只有約1%，比一三年嘅3.6%更低。多變、複雜嘅宏觀經濟形勢固然有影響，但我認為主因係時下芬佬變得愈嚟愈跟風，抱住「少勞多得」嘅心態，當有好「橋」時，大家就一齊湧入去，所以後來者嘅獲利空間就減少。例如去年多隻對沖基金，都係專攻印度股市或生物科技板塊。

Kitty：市場擔心業界今年會再次出現金融海嘯時期嘅倒閉潮喎，仲話首當其衝係資金規模僅10億美元以下嘅小型對沖基金添。

BS：我唔係太擔心。Simplify嘅客戶，有唔少係大型機構投資者，包括養老基金、主權財富基金等，雖然佢哋都話去年旗下對沖基金投資回報唔達標，考慮將資金轉移至新嘅基金經理，但起碼仍未撤出對沖基金資產類別。

事實上，投資者比以前更願意採用行內新手，亦唔介意基金管理資產規模細。我個人就覺得，其實小型對沖基金都有優勢，轉身快啲，要套現時可不動聲色。相反，大型基金嘅一舉一動都好容易畀市場察覺，吸引個人投資者跟隨，繼而影響資產價格，令每次出手嘅利潤減少，或虧損加大。

今年部署傾向防守

彩兒：咁對沖基金今年又有咩新部署，去挽回投資者對佢哋嘅信心？雖然我成副身家都未夠畀入場費，但率先偷師取經都無妨吖！

BS：以我觀察，佢哋目前嘅策略傾向防守性，除咗一直熱衷嘅房產市場外，主要持能源、食品股長倉，並繼續睇好生物科技板塊，因為呢啲都係生活中不可或缺（Can'tlivewithout）嘅部分，加上油價大跌，令市場預期將有更大回升空間。另外，歐洲局勢近期亦一片混亂，自然成為對沖基金持短倉嘅目標；佢哋暫時亦唔睇好「金磚四國」市場。以中國為例，對沖基金認為去年A股牛市傾向由政策主導，短期下行風險較大。

Kitty：咁穩陣嘅策略，睇嚟心思思想跟風嘅姊妹都諗得過。

BS：的確有參考價值，但對沖基金嘅實際操作當然係複雜好多，唔係單單買入股票等佢升咁簡單。散戶可考慮投資相關板塊或概念嘅交易所買賣基金（ETF）或互惠基金，流動性高啲、管理費用平啲。

亞洲基金太專注本土

彩兒：既然你研究過咁多對沖基金公司，唔知美國同中國嘅對沖基金，喺投資策略上又有無分別？

BS：美國對沖基金習慣放眼全球，邊度有投資機會就會去邊度，但中國及亞洲對沖基金都明顯較專注喺本土地區，反而唔係太活躍於投資海外市場或資產，以致回報未能達到最高。

Kitty：美國著名對沖基金經理阿克曼（BillAckman），打入咗一四年最賺錢對沖基金經理20強，係當中最年輕一位，亦係首度上榜嘅行內新星，名副其實嘅才俊啊！

BS：我覺得行內最勁嘅基金經理應該係美國對沖基金ElliottManagement舵手PaulSinger，雖然佢唔夠後生又唔夠有型，但佢投資都有一手。喺過去逾35年嘅年度化回報一直高於8.5%，公司資產規模目前已經超過250億美元喇。佢都榜上有名，排第九。

Brian Shapiro小檔案

現職：Simplify創辦人兼行政總裁

簡歷：91-07年：投資諮詢公司CarbonBased Consulting創辦人（公司已出售）、雷曼兄弟（Lehman Brothers）研究分析員及助理基金經理、耶魯大學客席講師等

興趣：運動與烹飪

彩兒&Kitty

若有料報畀彩兒同Kitty或有嘢問，可電郵money.biz@on.cc