絲絲講場：張灼華交棒中國人優先？
先前絲絲剛喺呢度講過證監會副行政總裁兼投資產品部、國際及中國事務執行董事張灼華下個月底就約滿，同工作咗十幾年嘅證監會分手，而絲絲最新聽聞，張灼華嘅繼任人選好快就敲定，候選人中更不乏本地城中猛人！
究竟邊個會做張灼華接班人，已經成為近期金融圈子熱議嘅話題之一。絲絲四出收風，風聞佢個位有唔少候選人都非常猛料。近年證監會新招聘嘅高層，都以鬼佬居多，但張灼華呢個位，可能有啲例外，請番中國人做，並不出奇。
同聲同氣方便返內地
事關證監會呢個位，要成日北上與內地官員接觸，眾所周知，證監會行政總裁歐達禮係西人，副手搵個中國人出任，都係好理所當然。況且，近年本港金融市場咁多嘢要同內地合作，繼千呼萬喚嘅滬港通後，嚟緊又有深港通，仲有證監會籌備經年嘅大製作中港基金互認安排，所以「同聲同氣」，都幾重要！事實上，絲絲聽聞嘅候選人就包括一些本地猛人。
近年本港有唔少財金界女話事人相繼離職，市場就揣測，城中唔少女強人，都好適合坐呢個位，好似財庫局前副局長梁鳳儀、將會於今年二月離任嘅滙豐香港「一姐」馮婉眉等，不過人哋有冇興趣就唔知喇。
其實大家唔使等好耐，答案下月底前自有分曉！
余絲韻