Market Insight：收租股升浪未完

睇嚟無論禁止翻牆的VPN，係咪真係影響到iPhone賣軟件，斷估CEO庫克都要第一時間搞妥呢個最重要市場，唔可以得失班果粉。iPhone 6一季勁賣7,500萬部，真係有人快活有人愁，幫蘋果公司生產液晶屏幕，亦係iPhone 6主要屏幕供應商的LG Display，舊年第四季盈利狂升五倍，仲恢復派息。

但同日，日本媒體就爆料話Sony要繼續縮皮，務求一七年財政年度前，再減低三成營運成本，要向智能手機部門開刀裁減近千職位，成個智能手機軟件市場的寡頭壟斷局面經已成形，IOS、Android兩分天下，但對於Android軟件開發商Google來說，做手機純粹佔收入一個極小部分。

古勝冇點你

萬里長空

但對其他Android手機硬件生產商而言，近年多時間，面對中國生產商割喉式競爭，小米、華為、中興（00763）、聯想（00992）及酷派（02369），間間都磨拳擦掌，話要大幅提高出貨量預期，價錢則愈鬥愈賤。

網絡經營商成贏家

近幾季，南韓三星電子，已經因為智能手機生意風光不再，季績級級落，搞到最近玩財技，以拆細討好股民，今年生產商在智能手機跳崖式跌價下，會有幾多被淘汰，不妨拭目以待，但用家及網絡經營商，可望成為大形勢下的受惠者。

早前，筆者出席一間私人銀行投資座談，席上賓架對美、歐及中國股市，都照例賣花讚花香，但不忘帶定頭盔，補充了幾點風險因素，例如美國經濟預測有過於樂觀的風險，歐央行QE成敗有待觀察，中國高勞動力成本令中低檔出口製造業復興困難等等。然而，幾位講者不約而同睇好美國30年債券，卻教筆者有點失望，要知30年美債息經已落到2.4厘歷史低位，假如回報如此低依然跑贏其他類別資產投資，好難想像個世界變成點樣。

近期，貨幣戰爭確實有山雨欲來之勢，歐央行無底線量寬，實行要推高通脹去到2%目標前都維持買債，印度、丹麥、加拿大都無聲無息減息，瑞士央行捍衞匯率的城牆，早在歐央行出手前崩塌，史無前例推出負0.75厘利息，避免熱錢繼續湧入，中國話放寬匯率波幅，實則畀人民幣跌得快啲。

美國加息講字居多

尋日港股開市前，輪到新加坡政府出手，調低通脹預期，同時降低匯率政策斜率，簡單講係新加坡元要進一步貶值，把通縮風險出口，咁情況推算，在全球鬥放水下，美國要反其道而行收水兼加息，恐怕得個講字居多。前晚FOMC開會前，華爾街已經驚定先急跌，聯儲局主席耶倫唔想做股市千古罪人，恐怕好大可能繼續借外圍經濟不穩過橋，加息拖得就拖。

照咁睇，家陣一切尚有3至4厘回報，而且展望可以維持之投資，吸引力都會增加，難怪息率落到3.3厘，為咗搵方法催谷回報，進軍東九龍做埋發展商的領匯（00823），可以繼續獲基金經理支持，REITs做埋發展商的工作好唔好？如果睇磚頭同租金都仲會升，當然係好事，但缺點係投資期長，短期又可能影響到分派。

置富具備注資概念

在各國央行鬥「晒冷」之下，資產泡沫可以吹到幾大，會唔會好快出現400呎樓賣過千萬？真係唔識睇，但股價尚未去到重估後資產淨值八成的地產股，筆者就認為大有留意價值。心水股新地（00016）續強，破一一年131.75元高位後，相信155元唔係天方夜譚。因為領匯的強勢，一堆收租股及REITs全線見追捧，希慎（00014）、陽房（00435）、恒隆地產（00101）、九倉（00004）及太古地產（01972）升幅介乎2至3.4%，當中希慎及恒隆派息紀錄唔錯，至少同領匯所差無幾。

不過，今年商舖及寫字樓租金，應該無乜升過，低息對佢地借貸成本好處又唔明顯，純追落後可以，但未必有太大爆炸力。近排極高調的四叔，旗下陽房舊年收購資產觸礁，被股東否決，今年會唔會捲土重來？睇去年中之後，陽房未停過咁升，照計單位派息率變相低咗，收購價應該可以「彈性」好多。當然，最後都要提一提隻心水置富（00778），長地重組後，未來應該有更多項目注入機會，唔可以走雞。

古勝