去年初辭去摩根大通投資銀行亞洲區副主席嘅方方，好耐冇喺香港「蒲頭」，佢昨日出席一個投資論壇時就講，近期除咗喺大學擔任導師，以及為家族進行投資活動外，原來喺今個月十五號，已獲政府委任為新一屆策略發展委員會的成員之一。
佢仲話，依家「都有成日喺香港呀！」但被問到廉署單「官二代招聘」調查進展時，佢就耍手擰頭話：「冇嘅，冇嘅。」方方喺工作有新開始，希望呢件事唔會對佢困擾太耐啦！
講到投資，方方話，投資企業好過投資創投基金，主要係市場有大量資金追逐少數較具質素的創新企業，依家做企業較創投基金有優勢，佢又講到，有創業公司喺短短半年內，估值已大升一倍，好和味。
另外，同場嘅暢銷書《新創企業之國：以色列經濟奇蹟的啟示》作者Saul Singer覺得，中國好多新發明同技術，仲話小米「very innovated （很創新）」，而且只係蘋果同三星一半價錢，但電量更大。絲絲就諗，除咗雷軍，世上好難搵到覺得小米創新嘅人，Saul Singer嘅一席話，雷軍聽到一定感動到淚流滿面。
余絲韻