絲絲講場：趙式芝開估 奇則係Melody
近排卓能（00131）荃灣壹號九龍山頂嘅獨特圓形開則，引起市場熱話，關於18、19樓特色戶間隔似乜眾說紛紜，有啲話似「傻豹」，究竟似邊個？尋日謎底終於解開，主持卓能香港賣樓嘅集團執行副主席趙式芝親自解畫，話似日系卡通角色My Melody多啲喎！
爸爸手筆「波形」設計
趙式芝話呢個圓形圖則係爸爸集團主席趙世曾設計，又笑住話佢好鍾意「波形」物體，例如係籃球咁。雖然大家話個則似唔同嘅卡通人物，但佢就話似My Melody多啲。
佢話有人覺得圓形間隔難擺傢俬，但當去睇示範單位就唔會咁覺；個盤最快今日會開放2個現樓示範單位，包括19樓特色戶同11樓A室。趙式芝話集團旗下好多物業都加入咗圓形元素，好似今年外地推售嘅3個新盤，包括馬來西亞、內地深圳卓能雅苑，同埋杭州卓能河畔。
趙式芝仲話，如果呢次賣樓反應好，或會再投地。個盤最快下個禮拜開價，月尾賣樓，首批約30伙，唔排除包括My Melody特色戶，價錢會參考同區新盤；至於長洲新盤新趙苑嘅23間別墅今年落成，但今年唔會推售。
余絲韻