社交網站一哥facebook（fb）最近搵咗間國際會計師事務所做咗份研究報告，話fb截至舊年十月嘅一年內，為全球經濟貢獻咗2,227億美元，折合港幣約1.74萬億，相當於葡萄牙舊年嘅國內生產總值（GDP）。
其中65%嚟自蓬勃嘅營銷活動，同時仲為世界帶來450萬份工，以及智能手機16%銷量，堪稱現代經濟嘅催化劑！
不過，坊間明顯唔肯畀Like呢份由德勤撰寫嘅報告，不滿佢哋攞「Like」度量經濟價值，用Event出席人數計算消費等方法，其中史丹福大學經濟學教授Roger Noll鬧爆份報告「無意義」。喬治馬森大學經濟學教授Tyler Cowen亦批評，fb係對經濟產生龐大影響，但無報告講到咁大，而且智能手機嘅價值就係畀人上fb，話fb令智能手機更好賣係倒果為因。
面對諸多質疑，德勤就以機密為由拒絕公開每個「Like」嘅經濟價值，只係引述研究話有人無社交網站就生存唔到。fb營運總監桑德伯格都力撐研究，聲稱新興市場啲消費者買智能手機就係為咗上fb，仲打算拎份報告喺家陣舉行中嘅達沃斯世界經濟論壇討論喎。
余絲韻