法國白朗、美國飛哥、意大利雙子星呢啲老牌家電品牌年輕一代可能唔識，不過喺五、六十年代佢哋不知幾巴閉。品牌本地代理商太平洋行行政總裁施國耀就講過，當年買得起冷氣機，就好似今日買「賓士」咁架勢。尋日大昌行（01828）宣布收購太平洋行七成股權，唔知易手之後呢批響噹噹老字號家電能唔能夠殺出一條新血路呢？
大昌行舊年話大搞內地網上零售平台，雖然當時管理層話主力做食品生意，不過依家收購咗咁大間分銷商，呢度可能係打入內地市場嘅「任意門」，幫旗下家電網銷到內地。
講返單刁，大昌行今次斥大約2.95億元收購太平洋行70%股權，代價由公司內部資源撥付。翻查資料，原來九九年馮氏集團（前稱利豐集團）都曾收購太平洋行，公司無透露馮氏家族仲有冇持股，大昌行同馮氏有無合作機會，大家可以拭目以待！
余絲韻