備受關注嘅世界經濟論壇年會，喺瑞士達沃斯（Davos）正式展開。去年被委任為世界經濟論壇基金董事會董事、相隔七年再次出席年會嘅阿里巴巴集團主席馬雲，自然成為各路傳媒約訪目標，不過對Schedule早已排得密密麻麻嘅巨企老總來說，要抽空接受訪問幾乎係不可能任務，有人甚至猜測馬雲在達沃斯就連去廁所，都可能要睇日程！
絲絲聽隨行嘅阿里相關人士講，馬雲忙到連去廁所都要排Schedule可能有啲誇張。但單睇馬雲喺跟隨總理李克強飛往瑞士前的一天，仍然在杭州親自接待到訪阿里及螞蟻金服的中央官員，足見馬雲講得上係風塵僕僕，部分活動日程緊迫到只有三分鐘確係唔出奇。
馬雲對上一次到達沃斯出席世界經濟論壇，已經係○七年嘅事，今次喺達沃斯已經成為國家代表級企業的領軍人物，其受重視嘅程度同○七年已不可同日而語！
講開阿里近日可謂動作多多，阿里日前入股以色列科技企業視覺碼（Visualead），據報涉資或達1,000萬美元。
公司關聯嘅支付寶又傳出將加入聊天功能，實行要與騰訊（00700）嘅微信全面交鋒。馬雲呢位世界級企業主管，肯定繼續忙到透不過氣！
余絲韻