Market Insight：聯通上望空間大

長期對中國口淡淡，預言經濟遲早撞板的諾貝爾經濟學獎得主克魯格曼（Paul Krugman），日前出席亞洲金融論壇，繼續佢淡友作風，笑中國GDP數字水分多，猶如科幻小說一樣咁虛幻。唔係幫克魯格曼講好說話，但股民因為克魯格曼悲觀假設做投資，實在無謂。

老實講，投資市場真係無幾多人，把祖國經濟數據信到十足十，單係睇彰顯國力的四大銀行股，全部單位數PE，只及國際同業平均一半左右，反映賓架老早將中資股好似歲晚大平賣打咗折。

古勝冇點你2015/01/22

萬里長空

股市流行掉轉頭炒

咁到底中國GDP數字有幾多水分存在？我等普羅投資者實在無法得知，只不過，由其他灌水誘因較低的數字，都可以睇到祖國今次經濟調整有幾嚴重。

國統局網絡話，舊年全國六千瓦以上電廠發電設備，平均利用小時4,286小時，創下一九七八年即係三十六年新低，按年減少235小時，全國發電量按年增長只得3.2%，比次按風暴逼到阿爺要出到4萬億元人仔救市的○八年增長5.6%更為疲弱。

姑勿論點，依家股市流行掉轉嚟炒，實體經濟愈糟糕，即係中央與人行入市干預，出手救經濟的誘因愈大。可以睇番上周五中證監言之鑿鑿，話要懲處個別違規向散戶融資融券的券商，搞咗個「一一九」股災，話口未完，收市幾間外資行已出嚟唱反調，瑞銀話打壓提供入市良機，美銀美林更估計中證監出手為人行降準鋪路，兩三個星期內會出招。

昨日滬綜指大升4.7%或150點，收報3,323點，成交額仲要創埋一月以來最多，可見等入市的人多過等食胡的人一大截，如果真係一月尾二月頭降準，睇怕滬綜指短期挑戰3,500點關口，唔會太令人意外。

阿里交易惹人聯想

漸漸唔跟美股，為A股馬首是瞻的港股，昨日反彈401點收報24,352點，收市創埋舊年九月以來新高，主板成交又再回到四位數字，相當有氣勢。喺無乜新故事之下，資金捧番高位回落唔少的內銀及保險股，基建公路股亦都因為祖國基建救經濟的想法而有支持。內地媒體報道，新華保險（01336）大股東中央匯金，可能把部分股份轉讓阿里巴巴，據聞匯金唔會將手上31.34%新華全數賣畀阿里。

交易引發很多聯想，阿里點解睇中華保？餘額寶湊大咗天弘基金，成為全國第一大Fund，是否食髓知味，想再打網絡金融、網絡投資主義？但點解想飲奶要自己養牛，仲唔似騰訊（00700）搞個微眾銀行揸住大股，只係以小投資者角色進場？抑或阿爺舊年咁支持阿里，去彼邦上市集資咁大筆美金返來，今次是純粹回饋行動？在下都係得個估字。

內地三間電訊商先後公布舊年十二月上客數字，基本上都延續下半年的強勢，中移（00941）新增4G客1,883萬戶，再創單月新高，累計去到9,006萬戶，聯通（00762）3G及4G用戶淨增加115.3萬戶，兩者合計數字去到1.49億戶。

看官都知，今年古勝對於內地手機生產商有相當大戒心，由小米帶頭的「頂爛市」智能手機戰，有愈演愈烈之迹象，小米嗰頭減價一舊水，以699元人仔推紅米2，轉頭聯想（00992）話出部規格相近的樂檬K3，賣599元人仔，無上市的華為更加推部399元人仔頂爛市。

4G機平賣益網絡商

要知一四年初內地4G手機仲賣緊三、四千人仔，依家十分之一價錢可以出機，你話邊個最着數，除用家外，肯定係網絡供應商，去年下半年中移及聯通等的手機補貼費，已經見到有幾着數，昨日中移進身紅底股，以股論股，聯通其實唔執輸。

其實建立鐵塔公司，對佢好處又比較大，現價12.02元，同舊年九月高位14.22元仲有段距離，實在落後得有點過分。瑞信啱啱出報告，給予聯通跑贏大市評級，睇18.85元，將佢打個九折，17元應該唔算奢望，尤其見資金開始狂掃中移，相信遲早水向低流，睇實隻聯通。

古勝