絲絲講場：騰訊聽歌App靜靜雞襲港
騰訊（00700）出咗「國際版」免費聽歌App JOOX，對準國際市場。騰訊國際業務部香港及台灣辦公室總經理譚樂文（Norman）話，有信心JOOX會有錢賺，但就神神秘秘咁唔肯講有冇下載目標、付費用戶量同投資額。Norman話JOOX推出兩星期反應幾好，睇好業務發展。
或搵電訊商合作
其實騰訊喺大陸做咗多年嘅聽歌App「QQ音樂」，因版權問題同埋想國際化多啲，就設計咗JOOX打海外市場。佢仲話，香港係JOOX第一步，未來想打入東南亞市場。
JOOX啱啱先起步未有大宣傳，Norman都會諗吓好似其他聽歌App咁同電訊商合作，不過好似冇乜對象揀喎。3香港有KKBOX；csl.又有MOOV。Norman樂觀咁話，合作都係傾番嚟啫，依家都係等多啲人試用吓JOOX先啦。佢仲話，短期會搞簽唱會或者小型演唱會，淨係exclusive畀JOOX用戶咋。
余絲韻