全球財富顧問Wealth-X最近就公布咗份報告，指嚟緊30年，全世界將會有一個財富大轉移，當中涉及嘅資產仲要高達16萬億美元，足足成124萬億港元，規模史無前例。
咁大筆嘅錢究竟會落喺邊啲人手上呢？咪就係一班含住金鎖匙出世、年齡大都係八十後嘅富二代囉，份報告指出，現時80歲以上嘅富豪嘅財富係40歲以下嘅5倍，當班年紀老邁嘅富豪過咗身，富豪榜就會被改寫，換成佢哋嘅後代。
而財富轉移當中嘅四成仲會發生喺美國，絲絲第一個諗起嘅就係希爾頓酒店集團嘅太子女Paris Hilton，今年二月十七日先滿34歲嘅佢，身兼歌手同演員，雖然緋聞多多兼曾因醉駕入獄，但始終係屋企嘅大家姐，所以繼承人嘅位置都坐得相當穩。
不得不提嘅仲有被封為全球最靚女富豪嘅伊萬卡‧特朗普（Ivanka Trump），今年也只得33歲，父親係紐約市著名地產大亨Donald Trump，等住伊萬卡承繼嘅身家足足係近百億美元呀。可惜，呢位靚女已經嫁咗人，仲有個可愛嘅囡囡添！
余絲韻