羊年快到，金融界又會印製賀年利是封送贈客戶，之不過今年嘅利是封，原來與以往有啲唔同，着重創意同埋實用為主。好似領匯（00823）今個新春就以「三代同堂」為主題推出利是封，外表睇色彩鮮艷，圖畫係三代共融歡欣景象，寓意一家人齊齊整整樂也融融。
通常啲利是封拆咗就會丟，最多都係放入廢紙回收箱，好少會留番下年再用。不過領匯今次好有心思，利是封沿側線拆開會變成揮春，一物二用唔會嘥，完全切合環保為下一代着想嘅三代共融主題。依家只要去佢哋指定商場購物滿200元就可換一包。
講開又講，臨近歲晚，有領匯股東趁住近期個價咁高，實行沽貨食胡過肥年。聯交所資料顯示，美國資本集團喺本月九日場內減持0.14%領匯，平均價48.462元，套現1.57億元，睇落都幾和味喎，集團依家仲持有9.94%好倉。
領匯今年大搞創意利是封之外，瑞銀亦有新搞作。瑞銀亞洲股票衍生產品銷售部執行董事李靄欣話，聽過有客戶反映較鍾意冇生肖嘅利是封，因唔小心入多咗第二年都可用番。而瑞銀每年嘅利是封設計都有啲唔同，今年就用「花」嚟做主題，寓意百花齊放。利是封亦有唔同尺寸同形狀，符合唔同客戶嘅實際需要。
不過，絲絲認為，要選今年最有意頭嘅創意利是封，似乎非內地人氣動畫人物喜羊羊嘅利是封啦啩！今年佢哋仲唔食正農曆羊年氣勢，授權嘅羊年利是封和揮春，肯定大賣啦。
余絲韻