Market Insight：聯想隨時母憑子貴

做股票的，好自然會關注特區叫停千萬元金融投資就可以移民的捷徑。唔少港人只係睇實每日百五個，每年五萬四個單程證來港數目，事實上，經由這條尊貴通道移居香港其實人數唔少，一三年有8,900人。近年唔少本地投資移民顧問及基金管理公司因為咁搵落唔少，依家一夜之間比人斷米路咪話唔突然。

據知，近年唔少三四線股畀這批焗住鎖定七年的「長期投資者」被引導去坐貨坐到乾晒，等莊家可以輕鬆放紙鳶，這種玩法恐怕因為政策有變而告一段落。至於叫停有錢人移民，保留放家庭團聚移民落嚟，對豪宅及勞動力市場有乜影響，古勝留番畀其他欄目去分析。

古勝冇點你 2015/01/15

萬里長空

講番股事，渣打集團（02888）裁員看來無令到分析員回心轉意，改變對公司淡淡哋的睇法。瑞銀出報告將評級降到落中性，目標價調低一成八至115元，話佢盈利或者見頂，認為短期業務轉型期，基本前景唔會有大轉變，亦怕渣打會減低派息，昨股價曾跌落108元，再創52周新低。

逆向思維買雅士利

雅士利（01230）發盈警，預告去年業績跌四成，主因內地奶粉市場增長放緩，加上蒙牛（02319）入主後重塑銷售渠道及成本費用增加所致。值得留意係股價最多跌6.1%，收市則倒升兩格報2.3元。一來佢股價由一三年高位5.5元已累積跌咗五成八，一四年業績倒退亦早喺市場預期之內。

公司舊年十月至批兩成五新股，以每股3.7元引入法國乳品公司達能，眨吓眼帳面輸三分一。今年蒙牛同達能兩大股東會唔會做番啲嘢，可能性不可抹殺，盈警都出埋，看來逆向思維的玩家，可趁機買番轉頭，博三月底業績前再無壞消息見光。

iPhone 6交易中心先達回收價，終於因為官網有現貨供應，長買長有而出現崩盤情況。講開蘋果公司，隔晚確認向美國專利商標區提交文件，申請穿戴式數碼相機系統，搞到極限運動玩家至愛的穿戴式攝錄影機公司GoPro（代號GRPO），在美股時段一度插水一成五，怕蘋果公司會好快撈過界，藉手機市場固有用家玩埋運動攝錄相機。

4G手機商鬥頂爛市

至於小米掌舵人雷軍，近期提到要以超越蘋果公司同三星，要將小米做到世界第一智能手機公司為目標。毫無疑問，智能手機的普及，已經逐漸成為個人通訊及資訊獲得的最重要工具，由數字上睇，也取代了個人電腦的地位，據統計機構IDC每季公布的個人電腦付運數字顯示，已在兩年多前見頂，啱啱對上一季出貨量又再減少2.4%。

然而，咁係咪代表智能手機股錢途無限，睇落又唔多似。小米因為收購美的電器關係，將一三年業績曝光，講到咁兇狠其實265億元人仔生意，只係賺3.47億元人仔，純利率1.3%，利錢之薄，同內地洗衣機、電視無乜分別。

今年內地N咁多間公司話要開發三至四百元人仔的4G手機，差不多只係舊年年初的六分一價錢左右。睇嚟係智能手機股大鑊，卻益咗內地三大電訊商可以減低補貼的格局。

做得比人更平更有成本優勢，因此坐擁近兩成PC市場的一哥聯想集團（00992），在PC界走紅海策略，不過周不時有新搞作，舊年斥資半百億美金收購摩托羅拉手機及IBM伺服器，有待收成，啱啱外電話佢準備將智能業務「神奇工場」獨立分拆上市。

神奇工場惹來憧憬

呢間將於今年四月成立的公司，主攻網上銷售智能手機及智能家居產品，高管透露的鴻圖大計，冀望新公司三年內估值達到50億美元。未開始接獨消費者的公司，去創造50億美元價值未算神奇，依家聯想市值都只係150億美元左右，換句話橫空出現的神奇工場，等於三分一間聯想的晒士。

在下唔係聯想高級副總裁陳旭東肚裏條蟲，真係唔知有乜部署，但未來三幾個月陸續有更多消息曝光，概念會唔會令母憑子貴，炒起埋聯想，卻是有點期待。佢股價由舊年九月12.64元，因為非中資金融股當衰，落去到9.68元，近排以旗形姿態在11元樓下整固，似乎有吼實必要。

古勝