絲絲講場：港人瞓得少健康包尾
信諾新發表健康調查報告話，喺亞太區嗰5個地區中，香港整體嘅評分得59.9分排最尾，而中國就有66.1分排第1。有38%香港受訪者每日瞓少過6個鐘，信諾建議香港人盡量瞓多啲，對健康好啲。
石湛深頻撲冇覺好瞓
之不過，香港人係咪真係咁唔注重健康呀？正當絲絲有點懷疑之際，原來連長駐香港嘅信諾環球國際市場主席石湛深（Jason Sadler）都話自己每日瞓得5個鐘，仲瞓得少過其他香港受訪者，佢希望今年可以瞓多啲咁話。
係咪喺香港工作壓力大所以瞓得少？Jason話每日5點起身，習慣咗好多年都係咁。佢仲話由大學時期已經係早起身溫書喇。佢話自己嚟咗香港好多年，都曾經駐過新加坡、北美、南美、歐洲做嘢，最enjoy都係香港生活，話香港同佢active嘅性格最match。
原來瞓得少最主要係因為Jason工作七成時間周圍飛，飽受時差影響，成日都瞓得唔係咁好。咁又係嘅，來往香港同歐洲嘅時區真係幾辛苦。
余絲韻