「債券大王」格羅斯舊年九月突然由佢所創辦嘅太平洋投資管理（Pimco）跳槽去名聲同規模都細得多嘅駿利資本管理，搞到滿城風雨。佢近日接受彭博電台訪問，親自解開謎團，首度承認當時的確係被Pimco「炒魷」，仲話離職前最少三次提出下放權力，但最終都「無得留低」。
格羅斯透露，因為個人作風同業務方向與管理層出現分歧，曾提出卸下行政委員會和薪酬委員會嘅工作，及改為管理封閉式基金，但對方認為呢啲提議唔係咁好，後來更考慮踢走佢，格羅斯遂先發制人。對此，格羅斯話：「估唔到管理委員會可以將創辦人以至公司名義上嘅領袖『炒魷』。」
其實，由舊拍檔埃利安去年初劈炮以來，唔少傳聞話格羅斯火爆導致二人決裂，有傳格羅斯離職前行為更愈益「離譜」，多名高層以集體辭職逼Pimco轟走格羅斯。
格羅斯慘成眾矢之的，但佢對自己嘅管理作風好有信心，話做領袖必須要「硬淨」，如果只係坐喺度等一個大家都認同嘅決定，一定有問題，亦唔能夠用呢個方法管理資金，到某一個時間必須要有人站出來作出決定，自言呢個就係自己嘅職責，而且頗為稱職。
余絲韻