絲絲講場：發展商派花紅如賣樓爽
臨近歲晚，傳統華資企業都會趁公司周年晚宴舉行前後發放年終獎金，慰勞一下辛苦咗成年嘅打工仔。就好似長實（00001）及恒地（00012）就分別喺昨日（十三日）及明日（十五日）向員工發放年終花紅，絲絲相信以一四年本港地產商嘅售樓成績，大部分發展商員工所分派嘅花紅，睇怕都會有相當份量。
恒地長實售樓標青
據絲絲所知，本港幾家華資地產大戶向員工派送花紅金額與表現掛鈎，但整體都相當爽手，當中恒地四叔最受員工稱道，外界估計其一四年售樓收入可達200億元以上，而長實一四年售樓成績最標青，計及寫字樓在內全年售樓收入按年或增長50%至300億元，兩家公司員工獲至少N倍於月薪嘅花紅，應該唔會太難。
代理闊綽嘉獎員工
至於新地（00016），早前就已有消息指出，公司於二月十三日舉行周年晚宴。按往年做法，新地亦會喺當天公布旗下員工嘅花紅金額，新地在一四年經歷多事之秋，管理層選在情人節前夕發放花紅，未知是否要為員工再增添一份暖意呢？
至於地產代理，中原地產去年首三季後勤員工累積花紅，有2.09至3.14個月花紅，按年多1.3倍。利嘉閣地產未有透露後勤員工花紅，但就話加薪5%。
余絲韻