中國電商巨頭阿里巴巴赴美上市後，集團投資嘅一舉一動迅即成為國際焦點，連市場傳聞都日日新鮮，前日就有內地報道話阿里創辦人馬雲睇中印度網付平台Paytm，尋日仲有韓媒消息言之鑿鑿咁話，阿里打算喺南韓打造「阿里巴巴城」，但阿里好快出聲闢謠，話有關傳聞純屬揣測，即係大家諗多咗囉。
據南韓媒體消息指，阿里將在南韓仁川建設規模達100萬平方米「阿里巴巴城」，投資額高達57億元人仔嘅項目，仲會由阿里同仁川市各投資一半金額。
對於呢個傳聞，阿里發言人都話南韓市場潛力龐大，但係有關「阿里巴巴城」傳聞則純屬揣測。不過，阿里投資消息仲未停，除咗投資印度電商之外，尋日再有內地報道引述消息透露，阿里擬重金戰略入股廣告平台易傳媒，睇嚟市場對阿里投資真係充滿憧憬，日日都有阿里嘅新鮮事。