絲絲講場：工總獻計 轉玩內銷
有人話女人錢好難賺，但原來細路仔生意亦唔易做。偉易達（00303）尋日發盈警，話今年三月底止嘅財年收入同毛利率難達預期，兩樣數據都會微跌，最主要原因係以歐美為主嘅兒童教育平板電腦銷情唔掂。生意難做咗，工總就建議港商可以諗諗內地市場，實行由外銷轉玩內銷。
偉易達兒童板腦滯銷
其實偉易達喺中期業績已經提過，兒童教育板腦市況艱難，雖然盈警通告無話競爭來自邊度，但總之兒童板腦嘅庫存比預期高，競爭仲相當激烈，消息仲拖累埋尋日股價跌8%，報105.8蚊。
絲絲覺得，歐美兒童市場收縮，呢樣先係最大問題，基於華人家庭最重視子女教育，香港工業總會主席劉展灝就建議，內地市場可以為香港玩具商提供一條新出路。佢話就算歐美市場經濟復甦，歐美需求平穩，但係增幅唔明顯。工總建議港商可以諗諗內地市場，實行「出口轉內銷」博一博。
玩具廠商會常務顧問楊子江仲樂觀預測，內地喺十年內會成為最大玩具市場之一，消費力同需求增長快，而人均消費會因為內地中產階層擴大同埋平均人工上升帶動。佢估計，十年內嘅玩具消費會追近美國。
余絲韻