今年《福布斯》香港50富豪榜新鮮出爐，頭十強富豪加咗新面孔。阿里副主席蔡崇信擠身富豪榜第九位，成為首個進身十強富豪榜嘅IT人，都咪話唔巴閉！
以往由地產發展商「壟斷」嘅香港富豪榜，今年好多位地產商嘅身家都縮咗水，反而令到蔡崇信有機可乘。多得阿里巴巴舊年美國上市，令佢嘅身家暴漲超過一倍至68.5億美元，增長幅度係冠絕富豪榜，睇嚟發展商富豪嘅地位漸漸畀IT界精英威脅到啦！
而長實（00001）主席李嘉誠就連續17年做首富，以335億美元身家坐穩首富之位。至於人稱「四叔」嘅恒地（00012）主席李兆基，就由第三位升到第二位，身家達250億美元；新世界發展（00017）「彤叔」鄭裕彤亦連跳兩級，由第五位跳升到第三位，身家達150億美元。第四位就由新鴻基地產（00016）郭炳江、郭炳聯兩兄弟蟬聯，身家達147億美元。而新地前主席郭炳湘今年發力，首度打入第十位，個人身家67億美元。
濠賭股舊年冇運行，搞到上年排第二位嘅銀河娛樂（00027）主席呂志和今年跌出三甲，以134億美元身家排第五，身家喺過去一年足足蒸發咗76億美元（約592億港元），真係慘情囉！
余絲韻