絲絲講場：財女興退休 張灼華無憾
尋日滙豐香港「一姐」馮婉眉突然爆出下月中離任消息，震撼銀行界，查實近排本港財金界女揸Fit人排住隊退休，繼財經事務及庫務局前常任秘書長區璟智喺平安夜離任後，另一名財金界女話事人，證監會副行政總裁張灼華亦會喺今年二月底退休。
張灼華喺證監會屬「老臣子」，佢九八年加入證監會，○一年起獲委為執行董事，○八年獲升為副行政總裁。不過佢舊年就冇再同政府續約三年，只續約一年，任期至到今年二月廿八號屆滿。證監會舊年六月已開始公開招聘投資產品部執行董事一職，當時市場已揣測張灼華今年二月任期屆滿後退休。
推動人民幣業務功臣
大家都知，中港基金互認一直係張灼華主催，差唔多可以用佢個「Baby」嚟形容，依家距離退休得番一個幾月，呢個Baby可唔可以喺佢退休前出到世，絲絲冇水晶球都唔知喇。
之不過，其實張灼華喺任內做過唔少大Project，包括人民幣合格境外機構投資者計劃（RQFII）、交易所買賣基金（ETF）、房地產投資信託基金（REIT）同人民幣計價基金等，喺推動香港離岸人民幣業務及人民幣投資產品上，做咗好大工夫。退休都應該無乜遺憾囉！
余絲韻