雖然昨日A股低收，但國企指數表現靠穩，中資股不乏炒作目標，除風電股同核電股之外，港口股亦普遍向好。其中，見到大連港（02880）有買盤積極掃入，全日高位見過3元，收報2.95元，升7.27%，成交1.28億元。
由於升勢有成交配合，相信仲有得去，呢浪目標反覆向阻力區3.5至3.6元水平推進。
促使昨日股價大勇其中一個原因，乃內地有消息指，大連自貿區的申報材料經已上報有關部門，雙方並已就此進行了溝通匯報，大連港A股（601880.SH）漲停收市，H股亦受帶動。
其實，若然睇往績，大連港表現都係一般般，去年首九個月累計營業收入僅升5%，純利倒退26%。不過，去年經營環境欠佳係全行業面對的問題，依家內地推動自貿區發展進行得如火如荼，若然上半年大連自貿區申請有着落，大連港確可直接受惠。
此外，講到更高層次的合作，乃去年末季中韓兩國領導人就成立中韓貿易區進行了實際性的談判，若然今年呢個大Project有眉目，大連港亦可視為得益者。
走勢方面，大連港股價在去年十一月炒過一浸上3.78元，主要係靠炒AH差價，其後概念退熱，股價又反覆回落至2.5元水平。最近指數表現上上落落，重磅股抖氣，近日部分資金又翻兜AH差價概念。以昨日大連港的成交看，可以同去年十一月那一浪相提並論，若短線交投維持活躍，可以密切留意。
DR.Stock