按摩保健品牌OTO嘅豪特保健（06880）早排賣盤畀內地騰邦物流，話事權即刻轉咗手，尋日公司仲大換血添，「賣盤後保持管理層不變」呢句說話似乎失效囉！
絲絲喺舊年十一月豪特保健賣盤前見過前CEO葉志禮，當時佢仲好堅定話，「賣盤嘅其中一個條件係保留現有管理團隊不變，而自己喺賣盤後會繼續持有股份，唔會離開公司。」話口未完，尋日公司出咗個通告話，主席同行政總裁等主要職位由葉氏兄弟轉為新股東嘅人，葉氏只係留番執董嘅頭銜，相信公司以後會係「新人事新作風」。
不過，豪特保健上市咁多年以嚟，業績都麻麻哋，發展速度都比較慢，依家大股東嘅背景相信可以加快公司發展，所以絲絲惟有拭目以待喇！
余絲韻