話咁快下個月又到農曆新年，聽聞證券界已密鑼緊鼓籌備新春團拜，今年特別提早喺大年初八（二月廿六號）舉行，佢哋唔係貪好意頭要擇好日，而係要遷就班政協三月初上京開會。
以往證券界團拜多數都喺正月十幾甚至廿幾日至舉行，今年農曆新年因為喺二月下旬（二月十九日係大年初一），三月初班證券界大佬又要上京開兩會，所以要提早團拜。
計絲絲話，其實咁咪仲好，更有過節氣氛。好彩港交所（00388）肯配合，當日仲訂到港交所展覽廳做團拜添。
今年春茗係證券界九會聯合主辦，包括網上經紀協會、證券業協會、貴金屬同業協會、股票分析師協會、證券學會、中資證券業協會、證券商協會、證券及期貨專業總會同埋中國金融協會。由於係業界大事，九會今日就開大會商討。
余絲韻