絲絲講場：經紀睇通 組團「深」入交流

依家暫時未有證券界同深交所交流嘅日期同詳情，不過，從經紀反應之快，可以見到深港通蓄勢待發，經紀有冇「大茶飯」食仲係未知數，但最緊要係快，先把握商機為上！

聯網測試成關鍵

絲絲收到料，深港通會係港交所（00388）繼滬港通後，下一個最快推出嘅重頭戲，事關最易做到同埋風險最小。之前滬港通要六個月時間籌備，初步估計深港通都唔會超過六個月先籌備到啩。換言之，唔排除深港通最快六、七月出台，不過當然要監管機構最後批准啦！

由於滬港通開車時，港交所同中登等大部分基建工作已完成，深港通開唔開到車，最重要就剩低深交所嘅系統準備好未，同埋與經紀、港交所及中登等嘅聯網測試係咪順利。

至於市場好關注嘅深港通額度同合資格投資股份，有熟悉市場人士就話，深圳係內地股票市場「細佬」，按政策常理分析，「細佬」嘅條件應該唔會超越「大佬」（上海），如果深港通嘅條件較寬鬆，相信滬港通都會放寬喎！

余絲韻