傳統家電市場競爭激烈，多間業界先後夥拍其他領域巨頭力爭盈利增長空間。國美電器近日有新搞作，去年底喺一級市場推出小件商品送貨服務，填補小件商品只賣唔送嘅市場空缺。絲絲八卦到，今次送貨嘅商品主要包括空氣淨化器、焗爐、電飯煲、豆漿機等產品。
國美睇好內地小家電市場無可厚非，之前有統計顯示，內地小家電市場規模約3,500億元人民幣，每年以30%嘅幅度高速增長，而隨着內地生活質素提高，唔同類型嘅小家電已經逐漸普及。
現時國美推出嘅服務地點初步喺北京、上海及廣州等一級市場，無論消費者喺網上抑或門店購買小件商品，都可以免費享受呢個即時配送服務。
絲絲仲八到國美已做到一日三達嘅服務。所謂一日三達，即係喺上午、下午同晚間三個時段，將送貨選擇交畀消費者。
國美總裁王俊洲仲話，會根據顧客購物成交時間，與劃定嘅截單時間比較，將全天送貨時段分為三個送貨波次，確保精準送貨。王總仲話，公司亦計劃將呢個服務拓展至全國各地區添！
余絲韻