Market Insight：內房股落後唔怕追

十二月澳門博彩收入232.85億澳門元，按年急挫30.4%，按月都要跌4.05%，聖誕假應旺唔旺，全年累積博彩收入3,515億澳門元，按年跌2.6%，在中央反貪腐措施及內地經濟增長放緩之影響下，近幾個月澳門大額賭廳都叫晒救命，話生意大跌四、五成。

一葉知秋，博彩股黃金期已過，一四年股價早已盛極轉衰，金沙中國（01928）股價由上半年高位67.14元，至今累積跌逾四成，銀娛（00027）亦同樣由高位跌掉近五成，濠賭股的高增長高估值不再，一五年兩股預測市盈率分別為14倍及14.5倍，其實仲係較恒指平均估值11倍為高。假如薪酬成本上漲趨勢持續，博彩收入見頂，即使估值去到近幾年來的新低，睇情況今年上半年會持續有反彈無得升的格局。

古勝冇點你2015/01/05

萬里長空

炒減息續成主流

元旦日，國統局公布十二月中國製造業和非製造業採購經理指數，當中，製造業PMI跌到落50.1，僅僅高於50的緊縮臨界點，反映製造業即使未去到衰退，但距離衰退亦只是一步之遙，尚幸依家A股主旋律，仲係炒緊人行上半年進一步減息甚至連環降準，為股市提供更多的流動性，反而對內地經濟復甦的預期，未有耐成為主流。

之不過，睇見上周五晚，恒指及國指夜期分別跌0.6%及0.9%，港股預託證券收低，睇怕今日早市之跌幅可能超過溫巴仙，為近日升勢來一個似樣的修正。事實上，恒指輾轉又再返到兩萬四邊緣，滬港通開車之後，四次受制於24,133至24,313點的恒指，走勢上需要出現突破，暫時睇落，除非祖國有更大的利好消息，否則資金高度集中個別板塊炒股唔炒市的情況，可能會持續落去。

姑勿論「一帶一路」，會唔會純粹是○九年四萬億元人仔基建的翻版，但面對近期中國公布的進口數據弱過藥煲、內需持續不足、出口又受到歐日經濟疲弱拖累，仲有去年人民幣跟住美元升值，成為強勢貨幣之一，進一步削弱中國的出口競爭力，似乎刺激基建投資，經已係阿爺手上數得出的刺激經濟板斧中，最有殺傷力的一招。

南北車仲未升夠

上周中國南車（01766）與北車（06199）終於落實合併，以達到祖國打造一間中國最大鐵路運輸設備公司、減低互相競爭、完成國家鐵路設備企業走出去的計劃。兩隻股份周三復牌急升後，估唔到仲未夠喉，上周五分別再升18%和16.4%。

不過，與其高追基建鐵路股，在下反而想趁機來個人棄我取，睇番內房股。事實上，炒人行放水，內銀股已經放了一大段直路，反而同樣多得祖國無形之手力托的內房，到上周五先至因為社科院預料，今年一線城市也可能跟隨二三線城市全面取消限購，以及北京元旦起上調住房公積金貸款額度而初見鑊氣。

近月內地樓價數據認真麻麻，七十大城市十一月樓價按年跌3.7%，連續三個月向下，跌勢並擴大到上海、北京等一線城市，按年跌幅分別為2.9%及2.1%。早排國統局公開話樓市已經由瘋狂中冷靜下來，看來全面退出調控措施，只係遲早問題。

去年四、五月，內地樓市見頂，但睇番內房股股價，早於一三年見頂。內房企業無趁一三年輝煌銷售積穀防飢，反而普遍提高借貸及新盤發展數目，形成去年上半年的高庫存積壓情況，有部分二三線城市的庫存相當於七十甚至一百個月的正常市場消耗量，要救市真係談何容易？

雅居樂受惠放水

由此可見，內地樓價今年好難避免受地心吸力影響，徐徐回落，如今要睇吓中央放水決心有幾大，大部分大行估有5至10%跌幅，以一個一放就亂、一收就死的市場而言，估得真係算保守。

不過，睇內銀股，就知依家個市追政策炒可以有幾癲，在下會揀財政負擔比較重、但項目較集中在一線城市的，最好仲係股價相對落後，心水包括雅居樂（03383）、富力地產（02777）及綠城中國（03900）。

古勝