孖妹Ｓ檔案：睇番今年最難忘係…

證券市場

凱基證券董事及研究部主管鄺民彬：玩A股最考EQ

Kitty：Ben哥，好耐無見！笑得咁開心，應該好滿意今年嘅投資回報？

時代金業董事總經理 吳捷鐘

敦沛期貨董事總經理 劉艷玲

鄺：就同你哋分享吓啲開心事啦！其實我年幾前已經睇好A股，所以買咗南方A50（02822及82822）。本來一直都死氣沉沉，仲曾經「碌」咗近一成，直到最近幾個月先發威，依家升幅都有三成喇。有時投資就係咁，唔開心嘅日子可能比開心嘅日子多，所以投資嘅EQ好重要。

彩兒：第四季A股漲勢真係銳不可當。咁公司生意係咪都如魚得水？

鄺：滬港通啟動後，反應比預期好，公司每日成交額平均多咗5,000萬至1億元。二○一五年，國家政策繼續鼓勵企業走出去，加上MSCI指數年中檢討，咁多利好因素，估計都好難壓低A股。我睇明年滬綜指見4,000點，恒指見26,000點。雖然內地經濟增長放緩，但正因為咁，市場先憧憬有救市措施出台，而內地嘅寬鬆貨幣政策，亦會吸引更多資金。

凱基證券董事及研究部主管鄺民彬：玩A股最考EQ

彩兒：你全職炒股八年，曾經靠投資窩輪由幾萬賺到200萬。今年滬港通通車，相關股份輪住炒，有無帶挈你筆資金倍增？

蔣：我已經無玩窩輪幾年喇，依家主力投資股票。本來今年有機會翻倍o架，可惜我每次都走得太快，實際只賺得四、五成。滬港通通車初期，我買入咗招行（600036.SH）同平保（601318.SH）。佢哋唔夠一個星期已經各自升咗幾蚊，我擔心會回調，咪沽貨獲利囉，點知佢哋愈升愈有。相比我嘅沽位，每股已經分別升多咗2蚊同20蚊喇。

Kitty：有錢賺已經唔錯啦。你眼光咁好，會唔會考慮再買A股？

蔣：暫時唔會喇，玩A股好難靠平日炒港股嘅思維捉路，基本上好似眯埋眼咁玩，見佢成交大咪衝入去囉。明年美國加息係最大隱憂，唔知股市會有咩反應，油價近期又跌得咁勁，惟有見步行步啦。

外匯市場

時代金業董事總經理吳捷鐘：沽圓誘惑最難耐

Kitty：日圓兌美元今年大跌，我哋同班姊妹已經遊咗幾轉東瀛，「濕平」、賞紅葉、食刺身，樣樣齊！我知你今年無去日本，係咪日日「吼」實匯市食「大茶飯」？

吳：邊有「大茶飯」吖！安倍政府致力推低日圓匯價救經濟係人都知，所以個個都沽Yen，諗住三月後就會走弱，誰不知足足牛皮咗近八個月先肯郁。好多人就係無耐性，結果到日圓大跌時反而錯失良機。我自己都係，今年兩度沽日圓都係微利而回，後期再追沽都無乜肉食。我覺得日圓明年會繼續跌，可能會逐步試125、130水平，甚至唔排除挑戰十二年前嘅135水平。

至於美元，我長線當然睇好，但正由於全世界都知明年加息，所以話唔定到時走勢會反覆，投資者要小心部署啊。

商品期貨

敦沛期貨董事總經理劉艷玲：油價勁瀉最意外

彩兒：雖然我哋同各位散戶一樣，唔熟悉商品市場，少投資石油，但油價喺短短幾個月直插谷底，叫人不禁倒抽一口涼氣！

劉：係啊，今年油價走勢都令我跌晒眼鏡。我本來睇今年95至105美元，點知去到第三季已經跌穿咗。其實油價下跌都唔係一朝一夕，供過於求問題一直存在，石油輸出國組織（OPEC）現時嘅姿態亦與過往有別，所以油價跌穿95美元之後，我都唔再「拗頸」。揸油無可能同佢死過，一定要識得轉軚。

Kitty：OPEC最大產油國沙特阿拉伯話，油價跌到20美元都無所謂，咁樣明年會唔會真係應驗o架？

劉：油價目前跌幅已經遠超預期，所以我唔會過分睇淡，估計明年全年平均價約85美元。我相信部分新興國家，例如中國會喺低位收儲石油商品，對商品價格有支持。

期指市場

駿溢環球金融董事總經理潘國華：月初個市輸得最甘

Kitty：Ole Ole Ole Ole！雖然孖妹唔係忠實球迷，但今年貴為「世盃年」，點都要提一提。聽聞缸友以往掛住睇波，個市靜到拍烏蠅，今年係咪一樣？

潘：今年反而唔算靜，世盃完咗之後，期指市場仲愈嚟愈旺，尤其第四季特別多事，滬港通、央行放水、「俄羅斯風暴」等，都令恒指波幅加大。

彩兒：玩期指，有波幅先有獲利嘛。有無難忘事同我哋分享吓？

潘：輸得好甘嗰次我記得！十二月首個交易日，市場充斥利好消息，個個都估大市會升，點知恒指大跌620點。有個客前一日唔單止持貨過夜，當日跌市仲要追貨，結果一日就輸咗400萬。所以我成日強調，唔好一輸咗錢就長揸，投資策略最緊要清晰；喺波動市時，愈短線反而愈安全。

二○一五年投資策略

鄺民彬：看好A股ETF、H股ETF及三大國策板塊（即基建、環保及醫療保健）

吳捷鐘：日圓於115至117水平值得沽售；美元於85至90水平建議買入

劉艷玲：「揸銀沽金」；持美元長倉；澳元兌美元跌至0.8水平可「吼」澳元

潘國華：看好H股指數期貨；建議趁油、金反彈時沽售，但切忌追沽

後記：

經歷完風高浪急嘅一年，孖妹喺「缸」湖上嘅道行又升一級喇！感激各位一路上拔刀相助。我哋一五年再見！

彩兒、Kitty

若有料報畀彩兒同Kitty或有嘢問，可電郵money.biz@on.cc